ஈரோடு
ஈரோடு மாவட்டத்தில் புதிதாக 397 பேருக்கு கொரோனா தொற்று உறுதியானது. மூதாட்டி உள்பட 2 பேர் பலியானார்கள்.
கொரோனா பாதிப்பு
தமிழகத்தில் கடந்த சில நாட்களாக கொரோனா தொற்று பரவல் குறைந்து வருகிறது. ஈரோடு மாவட்டத்திலும் உச்சத்தை எட்டிய தொற்று பாதிப்பு பிறகு குறைய தொடங்கியது. நேற்று முன்தினம் 3 ஆயிரத்து 976 பேருக்கு பரிசோதனை மேற்கொள்ளப்பட்டது. இதில் 405 பேருக்கு தொற்று உறுதியானது. இந்தநிலையில் நேற்று புதிதாக 397 பேருக்கு பாதிப்பு ஏற்பட்டது. இதனால் மொத்த பாதிப்பு எண்ணிக்கை 1 லட்சத்து 30 ஆயிரத்து 651 ஆக உயர்ந்தது. இதில் 1 லட்சத்து 23 ஆயிரத்து 474 பேர் குணமடைந்தனர்.
2 பேர் பலி
கொரோனாவில் இருந்து மீண்டு வருபவர்களின் எண்ணிக்கை அதிகமாக உள்ளதால் சிகிச்சை பெறுபவர்களின் எண்ணிக்கையும் குறைந்து வருகிறது. நேற்று மட்டும் 1,103 பேர் கொரோனாவில் இருந்து மீண்டனர். தற்போது 6 ஆயிரத்து 448 பேர் சிகிச்சை பெற்று வருகின்றனர். இதில் பெரும்பாலானவர்கள் வீட்டு தனிமையில் உள்ளனர்.
இதற்கிடையே ஈரோடு மாவட்டத்தை சேர்ந்த மேலும் 2 பேர் பலியாகி உள்ளனர். இதில் 90 வயது மூதாட்டி கொரோனா பாதிப்பு காரணமாக ஈரோட்டில் உள்ள ஒரு தனியார் ஆஸ்பத்திரியில் சிகிச்சை பெற்று வந்தார். அவர் கடந்த 4-ந் தேதி உயிரிழந்தார். இதேபோல் சென்னையில் உள்ள ஒரு தனியார் ஆஸ்பத்திரியில் சிகிச்சை பெற்று வந்த ஈரோடு மாவட்டத்தை சேர்ந்த 65 வயது முதியவர் நேற்று முன்தினம் உயிரிழந்தார். இதனால் ஈரோடு மாவட்டத்தில் கொரோனா பலி எண்ணிக்கை 729 ஆக உயர்ந்தது.