புதுடெல்லி,
மத்திய, மாநில அரசு பல்கலைக்கழகங்கள், நிகர்நிலை பல்கலைக்கழகங்கள், தனியார் பல்கலைக்கழகங்கள் ஆகியவற்றில் இளநிலை படிப்புகளில் மாணவர்களை சேர்க்க பொது பல்கலைக்கழக நுழைவுத்தேர்வு (கியூட்) கடந்த 2022-ம் ஆண்டு அறிமுகப்படுத்தப்பட்டது.இந்த ஆண்டுக்கான 'கியூட்' தேர்வு 2 மாதங்களுக்கு முன்பு நடத்தப்பட்டது. இன்னும் தேர்வு முடிவுகள் வெளியிடப்படவில்லை.இந்நிலையில், நேற்று தற்காலிக விடைக்குறிப்புகளை தேசிய தேர்வு முகமை வெளியிட்டது.
அதுபற்றி தேசிய தேர்வு முகமை உயர் அதிகாரி ஒருவர் கூறியதாவது:-தற்காலிக விடைக்குறிப்புகள் குறித்து தேர்வு எழுதியவர்களுக்கு ஏதேனும் ஆட்சேபனை இருந்தால், 9-ந் தேதி மாலை 6 மணிக்குள் தங்கள் ஆட்சேபனைகளை சமர்ப்பிக்கலாம். அவர்களின் ஆட்சேபனைகள், அந்தந்த பாட நிபுணர்கள் அடங்கிய குழு மூலம் பரிசீலிக்கப்படும். பின்னர், திருத்தப்பட்ட இறுதி விடைக்குறிப்புகள் அடிப்படையில் தேர்வு முடிவுகள் வெளியிடப்படும்.
அதுபோல், 'கியூட்' தேர்வு நடத்தப்பட்ட விதம் தொடர்பாக கடந்த 30-ந் தேதிவரை மாணவர்களிடம் இருந்து பெறப்பட்ட மனக்குறைகளை ஆய்வு செய்யும் பணி நடந்து வருகிறது.யாருடைய மனக்குறை நியாயமானது என்று கண்டறியப்படுகிறதோ, அவர்களுக்கு மட்டும் ஜூலை 15-ந் தேதியில் இருந்து 19-ந் தேதிக்குள் ஏதேனும் ஒரு தேதியில், குறிப்பிட்ட தேர்வு மையங்களில் தேசிய தேர்வு முகமை மறுதேர்வு நடத்தும்.இவ்வாறு அவர் கூறினார்.
