தூத்துக்குடி,
தூத்துக்குடி மாவட்டத்தில் 6 முதல் 9-ம் வகுப்பு வரை படிக்கும் மாணவ-மாணவிகளுக்கு தபால்துறை சார்பில் கல்வி உதவித்தொகை வழங்குவதற்கான திறனாய்வு தேர்வு நடைபெற உள்ளது. இத்தேர்வுக்கு வருகிற 16-ந் தேதிக்குள் விண்ணப்பிக்க வேண்டும்.
இது குறித்து தூத்துக்குடி தபால் கோட்ட தலைமை கண்காணிப்பாளர் அலுவலகம் வெளியிட்டுள்ள செய்திக்குறிப்பில் கூறி இருப்பதாவது:-
கல்வி உதவித்தொகை
தூத்துக்குடி மாவட்ட தபால் அலுவலகத்தில் ரூ.300 செலுத்தி தபால் தலைசேகரிப்பு கணக்கு தொடங்கிய மாணவ-மாணவிகளுக்கு தபால் துறை சார்பில் தீனதயாள் ஸ்பார்ஷ் யோஜனா என்னும் கல்வி உதவித்தொகை திட்டம் செயல்படுத்தப்பட்டு வருகிறது. அதன்படி தபால் தலை சேகரிப்பு கணக்கு தொடங்கி உள்ள 6-ம் வகுப்பு முதல் 9-ம் வகுப்பு வரை படிக்கும் மாணவ-மாணவிகளுக்கு தபால்துறை சார்பில் திறனாய்வு தேர்வு நடத்தப்படுகிறது. இந்த தேர்வில் வெற்றி பெறும் மாணவ-மாணவிகளுக்கு மாதம் ரூ.500 வீதம் ஆண்டுக்கு ரூ.6 ஆயிரம் வரை கல்வி உதவித்தொகை வழங்கப்படுகிறது.
விண்ணப்பிப்பது எப்படி?
ஆகையால் தபால்தலை சேகரிப்பு கணக்கு தொடங்கி உள்ள மாணவ-மாணவிகள் கல்வி உதவித்தொகைக்கான திறனாய்வு தேர்வு எழுத விண்ணப்பிக்கலாம். தபால் தலை சேகரிப்பு கணக்கு இல்லாதவர்கள், புதிதாக ரூ.300 தலைமை தபால் அலுவலகத்தில் செலுத்தி புதிய கணக்கை தொடங்கியும் உதவித்தொகைக்கான தேர்வுக்கு விண்ணப்பிக்கலாம்.
இந்த தேர்வுக்கு வருகிற 16-ந் தேதிக்குள் மதுரை தென்மண்டலம், கோவை மேற்கு மண்டலம், சென்னை மண்டலம், திருச்சி மத்திய மண்டலம் தபால்துறை இயக்குனர் அலுவலகங்களுக்கு அனுப்பி வைக்க வேண்டும். தபால் உறையில் தீனதயாள் ஸ்பார்ஷ் யோஜனா என்று எழுதப்பட வேண்டும்.
இவ்வாறு அந்த செய்திக்குறிப்பில் கூறப்பட்டு உள்ளது.