பிரதமர் மோடி தலைமையில் தேர்தல் கமிஷனர்கள் நியமனம் குறித்து நாளை ஆலோசனை கூட்டம்

புதுடெல்லி,

நாடாளுமன்ற தேர்தல் நெருங்கி வரும் நிலையில் தேர்தல் கமிஷனர் அருண் கோயல் கடந்த 9-ந் தேதி திடீரென ராஜினாமா செய்தார். மற்றொரு கமிஷனர் அனுப் சந்திர பாண்டேயும் கடந்த மாதம் ஓய்வு பெற்றிருந்தார். இதனால் தலைமை தேர்தல் கமிஷனர் மட்டுமே தேர்தல் கமிஷனில் பணியில் உள்ளார். 2 தேர்தல் கமிஷனர் பணியிடங்களும் காலியாக உள்ளன.

நாடாளுமன்ற தேர்தலை விரைவில் நடத்த வேண்டியதால் இந்த 2 பணியிடங்களை நிரப்ப மத்திய அரசு திட்டமிட்டு உள்ளது. இதற்காக வருகிற 15-ந் தேதி மாலையில் பிரதமர் மோடி தலைமையிலான தேர்வு கமிட்டியின் ஆலோசனை கூட்டம் நடைபெறும் என அறிவிக்கப்பட்டு இருந்தது. ஆனால் இந்த கூட்டத்தை ஒருநாள் முன்னதாகவே, அதாவது 14-ந் தேதி (வியாழக்கிமை) நண்பகல் 12 மணிக்கு நடத்த திட்டமிட்டிருப்பதாக தகவல் வெளியாகி இருக்கிறது.

இந்த கமிட்டி உறுப்பினர்களுக்கு இதற்கான நோட்டீஸ் நேற்று முன்தினம் அனுப்பப்பட்டது. 2 புதிய தேர்தல் கமிஷனர்களை இந்த குழுவினர் முடிவு செய்து ஜனாதிபதிக்கு அனுப்பி வைப்பார்கள். இதன் மூலம் அன்றைய தினமே இந்த நியமனம் நடைபெறும் என எதிர்பார்க்கப்படுகிறது.