புதுடெல்லி,
டெல்லியில் கட்டுமானத் தொழிலாளர் நலனுக்காக ஒதுக்கப்பட்ட பணத்தை ஆம் ஆத்மி அரசு பறிக்கிறது என பாஜக செய்தி தொடர்பாளர் சம்பித் பத்ரா குற்றம் சாட்டியுள்ளார்.
இது தொடர்பாக அவர் கூறுகையில், டெல்லி முதல்-மந்திரி கெஜ்ரிவாலின் நோக்கமும் நேர்மையும் மாசுபட்டு விட்டது. கட்டுமானத் தொழிலாளர்களைப் பொறுத்தவரை இது இந்தியாவின் மிகப்பெரிய ஊழல் வழக்கு ஆகும். மேலும், கட்டுமானத் தொழிலாளர்களுக்காக பணிபுரியும் 3 தன்னார்வ தொண்டு நிறுவனங்கள் மூலம் அவர்களது பதிவில் பெரும் ஊழல் செய்துள்ளதாக குற்றம் சாட்டினர்.
டெல்லியில் கடந்த 2006-21 ம் ஆண்டுகளில் சுமார் 13 லட்சம் கட்டுமானத் தொழிலாளர்கள் மாநில அரசின் தொழிலாளர் துறையில் பதிவு செய்துள்ளனர். இதில், 9 லட்சத்திற்கும் அதிகமானோர் 2018 முதல் 2021 வரை பதிவு செய்துள்ளனர்.
டெல்லி கட்டுமானத் தொழிலாளர்கள் துறையில் 2 லட்சம் போலி பதிவுகள் இருப்பது விசாரணையில் தெரியவந்துள்ளது. இதில் 65 ஆயிரம் தொழிலாளர்கள் ஒரே செல்போன் நம்பரையும், 15 ஆயிரத்து 700 பேர் ஒரே முகவரியையும், 4 ஆயிரத்து 370 பேர் ஒரே நிரந்தர முகவரியையும் அளித்துள்ளனர்.
கட்டுமானத் தொழிலாளர்களின் நலனுக்காக ஒதுக்கப்பட்ட பணத்தை டெல்லி அரசு பறித்து, அதனை ஆம் ஆத்மி கட்சி தொடர்பான பணிகளுக்கு செலவழிக்கிறது. இவ்வாறு அவர் தெரிவித்தார்.