புதுடெல்லி,
இந்தியாவில் கொரோனா 2-வது அலையின்போது அதிகாரபூர்வமாக அறிவிக்கப்பட்ட பலி எண்ணிக்கையை விட உண்மையிலேயே பலியானவர்கள் பல மடங்கு அதிகம் என்று சர்வதேச பத்திரிகை ஒன்றில் கூறப்பட்டுள்ளது.
இதற்கு மத்திய சுகாதார அமைச்சகம் மறுப்பு தெரிவித்துள்ளது. சுகாதார அமைச்சகம் வெளியிட்ட அறிக்கையில் கூறப்பட்டு இருப்பதாவது:-
இந்தியாவில் கொரோனா உயிரிழப்புகள் முறையாக பதிவு செய்யப்படுகின்றன. உலக சுகாதார அமைப்பின் வழிகாட்டு நெறிமுறைகளுக்கு ஏற்ப செயல்படுகிறோம்.
எனவே, சர்வதேச பத்திரிகையில் வெளியான தகவல் முற்றிலும் அடிப்படை ஆதாரமற்றது, பொய்யானது. மக்களை திசைதிருப்ப இதை செய்துள்ளனர்.
இவ்வாறு அதில் கூறப்பட்டுள்ளது.