பெங்களூரு,
கர்நாடகத்தில் காங்கிரஸ் எம்.எல்.ஏ.க்களை இழுக்க தலா ரூ.50 கோடி வரை பா.ஜ.க. பேரம் பேசுவதாக கடந்த சில நாட்களுக்கு முன்பு முதல்-மந்திரி சித்தராமையா கூறினார். கர்நாடகத்தில் உள்ள காங்கிரஸ் ஆட்சியை கவிழ்க்க முயற்சி நடப்பதாகவும் அவர் கூறினார்.
இந்த நிலையில் காங்கிரஸ் கட்சியை சேர்ந்த பி.ஆர். பாட்டீல் கலபுரகியில் இன்று நிருபர்களுக்கு பேட்டி அளித்தார். அப்போது அவர் கூறும்போது, கடந்த 2 மாதங்களுக்கு முன்பு பா.ஜ.க.வை சேர்ந்த பலம் வாய்ந்த தலைவர் என்னை தொடர்பு கொண்டு பேசினார். எம்.எல்.ஏ. பதவியை ராஜினாமா செய்துவிட்டு கட்சிக்கு வருமாறும், தேர்தல் செலவு மற்றும் உரிய பதவியும் வழங்கப்படும் என்றும் கூறினார்.
என்னை போல் மேலும் 3 எம்.எல்.ஏ.க்களிடமும் பேரம் பேசியுள்ளனர். இதுகுறித்து அனைத்து அனைத்து தகவல்களையும் முதல்-மந்திரி சித்தராமையாவிடம் தெரிவித்துள்ளேன். நான் எக்காரணம் கொண்டும் ஆபரேஷன் தாமரையில் சிக்கமாட்டேன். காங்கிரஸ் கட்சியை விட்டு விலக மாட்டேன் என கூறினார். இதனால், கர்நாடகாவில் குதிரை பேரத்தில் பா.ஜ.க. ஈடுபட முயன்றது என்ற குற்றச்சாட்டை அவர் கூறியுள்ளது பரபரப்பு ஏற்படுத்தி உள்ளது.