புதுடெல்லி,
தற்போது, அரசு ஆண் ஊழியர்களுக்கும், பெண் ஊழியர்களுக்கும் தங்களது ஒட்டுமொத்த பணிக்காலத்தில் மொத்தம் 730 நாட்கள் குழந்தை பராமரிப்பு விடுமுறை அளிக்கப்படுகிறது. முதல் 2 குழந்தைகளை வளர்க்கவும், கல்வி, உடல்நலக்குறைவு ஆகியவற்றுக்காக கவனித்துக் கொள்ளவும் இந்த விடுமுறையை பயன்படுத்திக் கொள்ளலாம். ஆனால், வாடகைத்தாய் மூலம் குழந்தை பெற்றுக்கொள்ளும் அரசு பெண் ஊழியர்களுக்கு குழந்தை பராமரிப்பு விடுமுறை அளிக்க விதிமுறைகள் இல்லாமல் இருந்தது.
இந்நிலையில், 1972-ம் ஆண்டின் மத்திய சிவில் சர்வீசஸ் (விடுமுறை) விதிமுறைகளில் மத்திய பணியாளர் நலத்துறை அமைச்சகம் திருத்தங்கள் செய்துள்ளது. இந்த திருத்தங்கள், அறிவிப்பாணையாக வெளியிடப்பட்டுள்ளன.
அதன்படி, வாடகைத்தாய் மூலம் குழந்தை பெற்றுக்கொள்ளும் அரசு பெண் ஊழியர்களுக்கு 180 நாட்கள் பேறுகால விடுப்பு வழங்கப்படும். 2 குழந்தைகளுக்கு குறைவாக இருந்தால்தான் அவர்கள் இச்சலுகையை பெற முடியும். குழந்தை பெற்றுக்கொடுத்த வாடகைத்தாய், அரசு ஊழியராக இருந்தால், அவருக்கும் 180 நாட்கள் பேறுகால விடுப்பு அளிக்கப்படும்.
வாடகைத்தாய் மூலம் குழந்தை பெற்ற ஆண் அரசு ஊழியர்களுக்கு குழந்தை பிறந்த 6 மாதங்களுக்குள் 15 நாட்கள் குழந்தை பராமரிப்பு விடுமுறை வழங்கப்படும் என்றும் திருத்தங்களில் கூறப்பட்டுள்ளது.