ஸ்ரீநகர்,
ஜம்மு - காஷ்மீரின் ஹந்த்வாரா பகுதியில் பயங்கரவாதிகள் பதுங்கியிருப்பதாக பாதுகாப்பு படையினருக்கு ரகசிய தகவல் கிடைத்தது. இதையடுத்து குறிப்பிட்ட இடத்தை சுற்றி வளைத்த பாதுகாப்பு படையினர் தீவிர தேடுதல் வேட்டையில் ஈடுபட்டனர். அப்போது அங்கு பதுங்கியிருந்த பயங்கரவாதிகள் பாதுகாப்பு படையினரை நோக்கி துப்பாக்கியால் சுட்டனர்.
இதற்கு பதிலடியாக பாதுகாப்பு படையினரும் தாக்குதல் நடத்தினர். இரு தரப்பினருக்கும் இடையே நடைபெற்ற இந்த துப்பாக்கிச்சண்டையில் பயங்கரவாதிகள் இருவர் கொல்லப்பட்டனர். இதில் சுட்டுக்கொல்லப்பட்ட பயங்கரவாதி ஒருவன் ஹிஸ்புல் முஜாகிதீன் பயங்கரவாத இயக்கத்தின் முக்கிய தளபதி என அடையாளம் காணப்பட்டது.
பல பயங்கரவாத தாக்குதல் சம்பவங்களில் தொடர்புடைய, மெஹ்ரஸுத்தின் ஹல்வாய் - 2011 ஆம் ஆண்டு பயங்கரவாத இயக்கத்தில் இணைந்ததாகவும் சமூக வலைத்தளங்கள் வாயிலாக பயங்கரவாதத்தை பரப்புவதில் கைதேர்ந்தவராக செயல்பட்டதாகவும் ஜம்மு காஷ்மீர் போலீஸ் அதிகாரிகள் தெரிவித்தனர்.