புதுடெல்லி,
வெளிநாட்டு பயணம் செய்யும் பயணிகள் விமான நிலையங்களில் குடியேற்ற நடைமுறையை முடிப்பதற்கு அதிக நேரத்தை செலவிட வேண்டியுள்ளது. இதை தவிர்க்க மத்திய அரசு சிறப்பு திட்டத்தை செயல்படுத்தி உள்ளது. அதாவது இந்தியர்கள் மற்றும் வெளிநாட்டு இந்தியர் அட்டை வைத்திருப்போருக்காக 'விரைவான குடியேற்றம் - நம்பகமான பயணி திட்டத்தை' அமல்படுத்தி உள்ளது.
முதல் முறையாக டெல்லி விமான நிலையத்தில் கடந்த ஆண்டு ஜூன் 22-ந் தேதி இந்த திட்டத்தை மத்திய உள்துறை மந்திரி அமித்ஷா தொடங்கி வைத்தார். இந்த திட்டம் மேலும் 7 விமான நிலையங்களுக்கு விரிவுபடுத்தப்பட்டு இருக்கிறது.
அதன்படி, விரைவான குடியேற்ற நடைமுறை சென்னை, மும்பை, கொல்கத்தா, பெங்களூரு, ஐதராபாத், கொச்சி, ஆமதாபாத் ஆகிய விமான நிலையங்களில் இன்று முதல் இது அமலுக்கு வந்துள்ளதாக உள்துறை அமைச்சகம் கூறியுள்ளது. இந்த திட்டம் https://ftittp.mha.gov.in என்ற இணையதளம் மூலம் செயல்படுத்தப்படும். இதை பயன்படுத்த விரும்பும் பயணிகள் தங்கள் பயோமெட்ரிக் விவரங்கள் உள்பட அனைத்து தரவுகளையும் மேற்கொண்ட இணையதளத்தில் பதிவு செய்து பயன்பெறலாம் என மத்திய அரசு கூறியுள்ளது.
