புது டெல்லி,
உலகின் சக்தி வாய்ந்த பாஸ்போர்ட் பட்டியலை லண்டனை தலைமையிடமாக கொண்டு செயல்படும் ஹென்லி பாஸ்போர்ட் இன்டெக்ஸ் நிறுவனம் வெளியிட்டுள்ளது. இதில் சிங்கப்பூர் முதலிடம் வகிக்கிறது.
ஜப்பான் 193 நாடுகளுக்கான விசா-இல்லா அனுமதியுடன் இரண்டாவது இடத்தில் உள்ளது. பிரான்ஸ், ஜேர்மனி, இத்தாலி, ஸ்பெயின் ஆகிய நாடுகள் இப்போது 192 நாடுகளுக்கு விசா-இல்லா அனுமதியுடன் மூன்றாவது இடத்தில் உள்ளன. அடுத்தபடியாக 192 நாடுகளுக்கு விசா இல்லாமல் நுழையும் அனுமதியுடன் ஆஸ்த்ரியா, டென்மார்க், அயர்லாந்து, லக்ஸ்சம்பர்க், நெதர்லாந்து, நார்வே, ஸ்வீடன் ஆகிய நாடுகள் நான்காவது இடத்தில் உள்ளன.இந்த பட்டியலில் இந்தியா 85-வது இடத்தில் உள்ளது. கடந்த ஆண்டு இந்தியா 80-வது இடத்தில் இருந்தது. தற்போது 5 இடம் பின் தங்கியுள்ளது.
பெல்ஜியம், போர்ச்சுகல், ஸ்விட்சர்லாந்து, பிரித்தானியா மற்றும் நியூசிலாந்து ஆகிய நாடுகள் 190 நாடுகளுக்கு விசா இல்லாமல் செல்லும் சலுகையுடன் ஐந்தாவது இடத்தில் உள்ளன. பிரித்தானியா, கடந்த சில ஆண்டுகளில் அதன் பாஸ்போர்ட் சக்தியில் பெரிய மாற்றங்களை சந்தித்துள்ளது. 2025-இல் பாஸ்போர்ட் சக்தி பாதிக்கப்படுவதற்கு போர்கள், அரசியல் கலவரங்கள் மற்றும் காலநிலை மாற்றங்கள் காரணமாக உள்ளன. இந்தியர்களுக்கு 57 நாடுகள், விசா இல்லா சலுகைகளை வழங்கி உள்ளது குறிப்பிடத்தக்கது.