புதுடெல்லி,
மத்திய வெளியுறவு ராஜாங்க மந்திரியாக பதவி வகிக்கும் எம்.ஜே. அக்பர் அரசியலுக்கு வரும் முன்பாக பல்வேறு பத்திரிகைகளில் ஆசிரியராக பணியாற்றியவர். அவருக்கு கீழ் பணிபுரிந்தபோது எம்.ஜே.அக்பர் தங்களிடம் தவறாக நடந்து கொண்டதாக 2 பெண் பத்திரிகையாளர்கள் அண்மையில் குற்றம்சாட்டி இருந்தனர்.
மத்திய மந்திரி எம்.ஜே.அக்பர் மீது அடுத்தடுத்து பெண் பத்திரிகையாளர்கள் பாலியல் குற்றச்சாட்டு கூறியுள்ளதால் இதுபற்றி விசாரணை நடத்த பா.ஜனதா முடிவு செய்துள்ளது.
இந்த நிலையில் வெளிநாட்டில் சுற்று பயணம் மேற்கொண்டிருந்த மத்திய மந்திரி எம்.ஜே. அக்பர் இன்று நாடு திரும்பினார். அவரை விமான நிலையத்தில் செய்தியாளர்கள் சந்தித்து பாலியல் குற்றச்சாட்டுகள் பற்றி பல்வேறு கேள்விகளை எழுப்பினர்.
அதற்கு அவர், இதுபற்றி பின்னர் அறிக்கை வெளியிடப்படும் என கூறிவிட்டு அங்கிருந்து சென்று விட்டார்.
கடந்த சில நாட்களில் பத்திரிகையாளர்கள் உள்பட பல பெண்கள் அவர் மீது பாலியல் குற்றச்சாட்டுகளை அடுக்கடுக்காக கூறி வருகின்றனர்.
வருகிற சட்டசபை தேர்தல்களில் இந்த விவகாரம் எதிர்விளைவுகளை ஏற்படுத்தி விட கூடாது என்பதற்காக இதுபற்றி இறுதி முடிவு எடுக்க பிரதமர் மோடி தலைமையில் ஆலோசனை கூட்டம் நடைபெறும் என கூறப்படுகிறது.