கொல்கத்தா,
மேற்கு வங்காள மாநிலத்தில் உள்ள 42 நாடாளுமன்ற தொகுதிகளில் பா.ஜனதா 18 தொகுதிகளில் வெற்றிபெற்றது. இது ஆளும் திரிணாமுல் காங்கிரசை விட 4 தொகுதிகள் மட்டுமே குறைவாகும். இந்த மகத்தான வெற்றியில் மிதந்துவரும் பா.ஜனதா கட்சியினர், எங்களது அடுத்த இலக்கு 2021 சட்டமன்ற தேர்தலில் திரிணாமுல் காங்கிரஸ் ஆட்சியை தூக்கியெறிவது தான் என கூறிவருகின்றனர்.
மாநிலத்தில் பா.ஜனதாவின் வளர்ச்சி முதல்-மந்திரியும், திரிணாமுல் காங்கிரஸ் தலைவியுமான மம்தா பானர்ஜிக்கு கடும் சவாலை உருவாக்கி உள்ளது. இந்நிலையில் மம்தா பானர்ஜி அரசியல் நிபுணர் பிரசாந்த் கிஷோருடன் சுமார் 2 மணி நேரம் ஆலோசனை நடத்தினார். பா.ஜனதாவின் வளர்ச்சியை தடுப்பது குறித்து அவர்கள் ஆலோசித்ததாக தெரிகிறது. இந்த சந்திப்பில் மம்தாவின் மருமகன் அபிஷேக் பானர்ஜி எம்.பி.யும் கலந்துகொண்டார். மம்தா விரும்பினால் வருங்காலத்தில் அவருடன் இணைந்து பணியாற்ற கிஷோர் தயாராக இருப்பதாகவும் தெரிவிக்கப்பட்டுள்ளது.