மெகுல் சோக்‌ஷி விஷயம் தெரிந்து இருந்தால் குடியுரிமை கொடுத்திருக்க மாட்டோம் - ஆன்டிகுவா

புதுடெல்லி,

பிரபல வைர வியாபாரி நிரவ் மோடியும், அவருடைய நெருங்கிய உறவினரான மெகுல் சோக்ஷியும் பஞ்சாப் நேஷனல் வங்கியில் ரூ.13,000 கோடிக்கு மேல் கடன் பெற்று மோசடி செய்துள்ளனர். இருவரும் இந்தியாவை விட்டு வெளியேறிவிட்டனர். வங்கி மோசடி தொடர்பாக சிபிஐ, அமலாக்கப்பிரிவு, வருமான வரித்துறை உள்ளிட்ட விசாரணை முகமைகள் விசாரணையை மேற்கொண்டது.

மோசடி தொடர்பான விசாரணை தொடங்கியதுமே விசாரணைக்கு ஆஜராக சம்மன் விடுக்கப்பட்டது. ஆனால் இருவர் தரப்பிலும் மறுப்பு தெரிவிக்கப்பட்டது. அவர்களுக்கு எதிராக ரெட் கார்னர் நோட்டீஸ் விடுக்க அமலாக்கப்பிரிவு சர்வதேச போலீசான இன்டர்போலை நாடியது. இதனையடுத்து நிரவ் மோடிக்கு எதிராக இன்டர்போல் ரெட்கார்னர் நோட்டீஸ் விடுத்துள்ளது. இதேபோன்று மெகுல் சோக்ஷிக்கு எதிராகவும் ரெட்கார்னர் நோட்டீஸ் விடுப்பதற்கான பணியை இந்தியா முடித்துவிட்டது. மெகுல் சோக்ஷி அமெரிக்காவில் இல்லை என்பது தெரியவந்தது.

இந்நிலையில் மெகுல் சோக்ஷி ஆன்டிகுவா நாட்டில் இருப்பதாக தகவல் வெளியாகியது. ஜூலை மாதம் கார்பியன் தேசமான ஆன்டிகுவாவிற்கு சென்ற மெகுல் சோக்ஷி அங்கு உள்ளூர் பாஸ்போர்ட்டை பெற்றது தெரியவந்தது. இதனையடுத்து அந்நாட்டு அதிகாரிகளை நாடியுள்ள சிபிஐ, மெகுல் சோக்ஷிக்கு எதிராக இன்டர்போல் வெளியிட்ட நோட்டீஸை குறிப்பிட்டு, அவர் எங்கிருக்கிறார், அவர்களுடைய நகர்வு என்னவாக இருக்கிறது என்பது தொடர்பான தகவலை அளியுங்கள் என கேட்டுள்ளது என தகவல் வெளியாகியுள்ளது. ஆன்டிகுவா நாளிதழ் வெளியிட்ட செய்தியின்படி அவர் அந்நாட்டில் 2017-ம் ஆண்டு குடியுரிமை வாங்கியுள்ளார் என்பது தெரிகிறது.

இந்நிலையில் ஆன்டிகுவா அரசு, மெகுல் சோக்ஷிக்கு குடியுரிமை வழங்கியதால் அந்நாட்டு எதிர்க்கட்சிகளிடம் கடும் எதிர்ப்பை சந்தித்து வருகிறது. ஆன்டிகுவா நாட்டின் முதலீடு செய்யும் போது கிடைக்கும் சலுகையின் மூலம் விசாவை பெற்றுள்ளார் மெகுல் சோக்ஷி. இந்நிலையில் வங்கி மோசடியில் மெகுல் சோக்ஷி மீது குற்றச்சாட்டு பதிவுசெய்யப்பட்டது தெரிந்து இருந்தால் நாங்கள் குடியுரிமை வழங்கியிருக்க மாட்டோம் என ஆன்டிகுவா தெரிவித்துள்ளது.

ஆன்டிகுவா வெளியுறவுத்துறை மந்திரி இபி செட் கீரினே, என்டிடிவிக்கு அளித்துள்ள பேட்டியில், வங்கி மோசடி தொடர்பாக மெகுல் சோக்ஷி மீது குற்றம் பதிவுசெய்யப்பட்டது எங்களுக்கு தெரிந்து இருந்தால் நாங்கள் குடியுரிமை வழங்கியிருக்க மாட்டோம். இப்போது அவரை நாடு கடத்த வேண்டும் என்ற இந்திய அரசின் கோரிக்கைக்கு எங்களுடைய அரசு ஒத்துழைப்பு வழங்கும் என கூறியுள்ளார்.