புதுடெல்லி,
மூன்று முறை தலாக் சொல்லி மனைவியை விவாகரத்து செய்யும் நடைமுறையை மேற்கொள்ளும் இஸ்லாமிய மதத்தை சேர்ந்த ஆணுக்கு 3 ஆண்டுகள் சிறைத்தண்டனை விதிக்க வகை செய்யும் சட்ட மசோதா, கடந்த 17ஆம் தேதி அன்று மக்களவையில் தாக்கல் செய்யப்பட்டது. வியாழக்கிழமை அன்று மசோதா மீது வாக்கெடுப்பு நடத்தப்பட்டது. இதில் 245 பேர் மசோதாவுக்கு ஆதரவாகவும், 11 பேர் எதிராகவும் வாக்களித்தனர். இதனால் மக்களவையில் மசோதா நிறைவேறியது.
இந்த நிலையில் மாநிலங்களவையில் இந்த மசோதா இன்று தாக்கல் செய்யப்படுகிறது. இந்த மசோதாவுக்கு மக்களவையில் எதிர்ப்பு தெரிவித்த காங்கிரஸ் கட்சி, மாநிலங்களவையில் இந்த மசோதாவை நிறைவேற்ற விடமாட்டோம் என அறிவித்து உள்ளது.
பா.ஜ.க.வுக்கு உறுப்பினர் எண்ணிக்கை குறைவாகவே உள்ளதால், மசோதா நிறைவேற எதிர்க்கட்சிகளின் ஒத்துழைப்பு அவசியம்.
இந்த மசோதாவை எதிர்க்கப்போவதாக அதிமுக, தெலுங்குதேசம், திமுக, காங்கிரஸ், திரிணாமுல் காங்கிரஸ் உள்ளிட்ட எதிர்க்கட்சிகள் தெரிவித்துள்ளன. மாநிலங்களவை உறுப்பினர்கள் அனைவரும் தவறாமல் ஆஜராகும்படி பா.ஜ.க., காங்கிரஸ் உள்ளிட்ட கட்சிகளின் கொறடா உத்தரவு பிறப்பித்துள்ளன. தற்போது மாநிலங்களவையில் ஆளும் பாஜக தலைமையிலான அணிக்கு 93 உறுப்பினர்களே ஆதரவாக உள்ளனர். காங்கிரஸ் தலைமையிலான அணிக்கு 112 உறுப்பினர்கள் உள்ளனர். இதர கட்சிகளின் உறுப்பினர்கள் 39. ஓரிடம் காலியாக உள்ளது.
இந்த நிலையில், நாடாளுமன்ற மேலவையில் குலாம் நபி ஆசாத்தின் அறையில் எதிர்க்கட்சிகளின் கூட்டம் இன்று நடைபெற்றது.
இன்று மாநிலங்களவை கூடியதும் எதிர்க்கட்சிகள் பல்வேறு பிரச்சினைகளை வலியுறுத்தி அமளியில் ஈடுபட்டன. இதனால் அவை மதியம் 2 மணி வரை ஒத்திவைக்கப்பட்டு உள்ளது. இதனால் முத்தலாக் மசோதா தாக்கல் செய்வதில் தாமதம் ஏற்பட்டு உள்ளது.
முத்தலாக் மசோதாவை தேர்வு குழுவுக்கு அனுப்ப வேண்டும் என்ற திரிணாமுல் காங்கிரஸ் எம்.பி.யின் தீர்மானத்திற்கு அதிமுக, திமுக உள்ளிட்ட 11 கட்சிகள் கையெழுத்திட்டு மாநிலங்களவையில் வழங்கி உள்ளன.