வருமானத்தை இரு மடங்காக உயர்த்துவதாக கூறிய பா.ஜ.க. ஆட்சியில் விவசாயிகள் வருமானம் வீழ்ச்சி - அனைத்திந்திய கிசான் காங்கிரஸ்

காங்கிரஸ் குற்றச்சாட்டு

காங்கிரஸ் கட்சியின் விவசாயிகள் பிரிவான அனைத்திந்திய கிசான் காங்கிரஸ் தலைவர் சுக்பால் சிங் கைரா, டெல்லியில் நேற்று நிருபர்களுக்கு பேட்டி அளித்தார். அப்போது அவர் கூறியதாவது:-

2022-ம் ஆண்டுக்குள் விவசாயிகள் வருமானம் இரு மடங்காக உயர்த்தப்படும் என்று பிரதமர் மோடி 2016-ம் ஆண்டு, பிப்ரவரி மாதம் வாக்குறுதி அளித்தார். ஆனால் விலைவாசி உயர்வையும் கணக்கில் கொண்டால், விவசாயிகள் வருமானம் சமீபத்திய ஆண்டுகளில் வீழ்ச்சியைத்தான் சந்தித்து இருக்கிறது.

2004-ம் ஆண்டு தொடங்கி 2014-ம் ஆண்டு வரையிலான 10 ஆண்டு கால காங்கிரஸ் ஆட்சியின்போது விவசாயிகள் வருமானம் இரு மடங்குக்கு மேலாக அதிகரித்தது.

குறைந்தபட்ச ஆதரவு விலை

விவசாயிகள் வருமானத்தை நிர்ணயிப்பதில் குறைந்தபட்ச ஆதரவு விலைதான் முக்கிய அளவுகோல் ஆகும். காங்கிரஸ் கூட்டணி ஆட்சிக்கு வந்து 8 ஆண்டுகளுக்குள் இரு முக்கிய பயிர்களான கோதுமை மற்றும் நெல்லின் குறைந்தபட்ச ஆதரவு விலையை இரு மடங்காக உயர்த்தியது.

சுதந்திரத்துக்கு பின்னர் பூச்சிக்கொல்லி மருந்துகள், உரம், வேளாண் கருவிகளுக்கு ஜி.எஸ்.டி. விதித்த முதல் அரசு, மோடி அரசுதான்.

விவசாயிகள் வருமானத்தை 2022-க்குள் இரு மடங்காக உயர்த்துவோம் என்று பிரதமர் மோடி கூறிய நிலையில், இதற்காக 2016-ம் ஆண்டு அமைத்த குழுவின் பரிந்துரைகள் என்னாயிற்று?

விவசாயிகள் வருமானத்தை இருமடங்காக உயர்த்துவதற்காக 2016-ம் ஆண்டு அமைக்கப்பட்ட விவசாயிகள் வருமான குழு (டிஎப்ஐசி), 2018-ல் தனது அறிக்கையை அளித்தது. அந்த அறிக்கை இன்னும் அதிகார வர்க்கத்தின் தாழ்வாரத்தில் தூசி தட்டிக்கொண்டிருக்கிறது.

இவ்வாறு அவர் கூறினார்.