புதுடெல்லி,
ரெயில் டிக்கெட்டுகள் முன்பதிவு செய்யும்போது 1 முதல் 4 வயதுக்குட்பட்ட குழந்தைகளுக்கு பெரியவர்களுக்கு ஈடான கட்டணம் வசூலிக்கப்படுவதாக செய்திகள் பரவியது. இதையடுத்து ரெயிலில் பயணிக்கும் குழந்தைகளுக்கான டிக்கெட்டுகளை முன்பதிவு செய்வது தொடர்பான விதிகளில் மாற்றம் இல்லை என்று ரெயில்வே அமைச்சகம் தெளிவுபடுத்தியுள்ளது.
ரெயில்வே அமைச்சகத்தின் 2020 தேதியிட்ட சுற்றறிக்கையில், 5 வயதுக்குட்பட்ட குழந்தைகள் இலவசமாக பயணம் செய்யலாம் என்று கூறப்பட்டுள்ளது. ஆனால் அவர்களுக்கு தனி பெர்த் அல்லது இருக்கை வழங்கப்படமாட்டாது. இருப்பினும் 5 வயதுக்குட்பட்ட தங்கள் குழந்தைகளுக்கு தனி பெர்த் அல்லது இருக்கை வேண்டும் என்றால் அதற்காக முழு தொகையை செலுத்த வேண்டும் என்று குறிப்பிடப்பட்டுள்ளது.
தற்போது இந்த விதிகளில் எந்த மாற்றமும் இல்லை என்று ரெயில்வே அமைச்சகம் திட்டவட்டமாக தெரிவித்துள்ளது.