புதுடெல்லி,
இந்திய வானிலை ஆய்வு மையத்தின் இயக்குநர் ஜெனரல் மிருத்யுன்ஜெய் மொகபத்ரா இணையம் வழியே செய்தியாளர்கள் சந்திப்பில் பங்கேற்று பேசினார். அவர் கூறும்போது, நடப்பு ஆண்டு ஆகஸ்டு மாதத்தில், பல்வேறு மாநிலங்களில் எதிர்பாராத அளவுக்கு மழை பெய்துள்ளது.
இதில், மாதத்தின் 2-வது பாதியில் இயல்பை விட கூடுதலாக மிக அதிக அளவு மழைப்பொழிவு இருந்தது. அது செப்டம்பரிலும் நீடிக்கும் என எதிர்பார்க்கப்படுகிறது.
ஆகஸ்டில் இந்தியா முழுவதும் பெய்த மழையளவு 268.1 மி.மீ ஆகும். இது 2001-ம் ஆண்டில் இருந்து 7-வது முறையாக அதிகம் ஆகும். 1901-ம் ஆண்டில் இருந்து 45-வது அதிக மழை பொழிவாகும் என்றார்.
வடமேற்கு இந்தியாவில் 265.0 மி.மீ. மழை பெய்துள்ளது. இது 2001-ம் ஆண்டில் இருந்து பெய்த அதிக மழைப்பொழிவு ஆகும். 1901-ம் ஆண்டில் இருந்து 13-வது அதிக மழை பொழிவாகும் என்றார்.
தெற்கு தீபகற்ப இந்தியாவில் 250.6 மி.மீ. மழை பெய்துள்ளது. இது 2001-ம் ஆண்டில் இருந்து 3-வது அதிக மழைப்பொழிவு ஆகும். 1901-ம் ஆண்டில் இருந்து 8-வது அதிக மழை பொழிவாகும் என கூறியுள்ளார்.