புதுடெல்லி,
நாடாளுமன்றத்தில் மத்திய மந்திரி சிராக் பஸ்வானும் பா.ஜனதா எம்.பி கங்கனா ரனாவத்தும் சந்தித்துக்கொண்ட வீடியோ சமூக வலைத்தளங்களில் வைரலாகி வருகிறது.13 வருடங்களுக்கு முன்பு ஒரே திரைப்படத்தில் கதாநாயகன் நாயகியாக நடித்த இருவர் தற்போது எம்.பி.யாக பதவியேற்று நாடாளுமன்றத்தில் சந்தித்து கொண்டுள்ளனர்.
பீகாரின் மூத்த அரசியல்வாதியான ராம் விலாஸ் பஸ்வானின் மகனான சிராக் பஸ்வான் 2011 ஆம் ஆண்டு மைலே நா மைலே ஹம் என்ற திரைப்படத்தில் ஹீரோவாக அறிமுகமானார். அப்படத்தில் அவருக்கு ஜோடியாக கங்கனா நடித்திருந்தார்.அந்த படம் மிகப்பெரிய தோல்வியை சந்தித்ததால் சினிமாத்துறையில் இருந்து விலகி முழுநேர அரசியல்வாதியாக சிராக் பஸ்வான் மாறினார்.
தற்போது ஹாஜிபூர் தொகுதியில் போட்டியிட்டு வென்று எம்.பி.யான சிராக் பஸ்வான், உணவு பதப்படுத்தும் தொழில்துறையின் மந்திரியாக பதவியேற்றுள்ளார். இமாச்சலப்பிரதேசத்தின் மண்டி தொகுதியில் பா.ஜனதா சார்பில் போட்டியிட்டு வென்ற கங்கனா எம்.பி.யாக பதவியேற்றுள்ளார்.
