புதுடெல்லி,

காங்கிரஸ் மூத்த தலைவர் சோனியா காந்தி (வயது 78) திடீர் உடல்நலக்குறைவால் கடந்த 15-ந் தேதி டெல்லியில் உள்ள கங்காராம் ஆஸ்பத்திரியில் அனுமதிக்கப்பட்டார். வயிறு தொடர்பான பிரச்சினை அவருக்கு இருந்தது. டாக்டர்கள் அவருக்கு தீவிர சிகிச்சை அளித்தனர். இதில் உடல்நிலை சீரானதாக தகவல் தெரிவிக்கப்பட்டது. இதனைத் தொடர்ந்து அவர் சில தினங்களுக்கு முன் வீடு திரும்பினார்.

இந்த நிலையில் 17-ம் தேதி அவருக்கு திடீரென உடல்நல பாதிப்பு ஏற்பட்டது. இதனைத்தொடர்ந்து காலை 10 மணி அளவில் அவர் அதே ஆஸ்பத்திரிக்கு சிகிச்சைக்காக சென்றார். அவருக்கு டாக்டர்கள் அமிதாப் யாதவ், ஆந்திராவைச் சேர்ந்த நந்தினி ஆகியோர் சிகிச்சை அளிப்பதாக ஆஸ்பத்திரி தலைவர் அஜய் சுவரூப் தெரிவித்தார் சோனியா காந்தி குணம் அடைந்து வருவதாகவும், அவரது உடல்நிலை உன்னிப்பாக கவனிக்கப்படுவதாகவும் கூறினார்.

இந்தநிலையில் கங்காராம் ஆஸ்பத்திரி நிர்வாகம் வெளியிட்ட அறிக்கையில்,

சோனியா காந்தியின் உடல்நிலை சீராக உள்ளது, அவர் தொடர்ந்து டாக்டர்களின் கண்காணிப்பில் உள்ளார். அவரது உடல்நிலை சீராக முன்னேறி வரும் நிலையில், மருத்துவமனை இன்னும் டிஸ்சார்ஜ் தேதியை முடிவு செய்யவில்லை. அவர் குணமடைந்ததை பொறுத்து டிஸ்சார்ஜ் குறித்து முடிவு எடுக்கப்படும்.

இவ்வாறு அதில் தெரிவிக்கப்பட்டுள்ளது.