வேளாண் கழிவுகளை எரிப்பதை கட்டுப்படுத்த மாநிலங்கள் நடவடிக்கை எடுக்க வேண்டும் - நரேந்திர சிங் தோமர்

புதுடெல்லி,

புதுடெல்லியில் மத்திய வேளாண் மந்திரி நரேந்திர சிங் தோமர் செய்தியாளர்களை சந்தித்தார்.

அப்போது அவர் கூறியதாவது, "வேளாண் கழிவுகளை எரிப்பதை கட்டுப்படுத்த கோடிக்கணக்கான ரூபாய் மற்றும் 2 லட்சம் இயந்திரங்களை வழங்கியும், வேளாண் கழிவுகளை எரிக்கும் சம்பவங்கள் அதிகரித்து வருவது கவலை அளிக்கிறது.

வேளாண் கழிவுகளை எரிப்பது அரசியல் பிரச்சினை" அல்ல, அதைத் தடுக்க மாநிலங்கள் செயல்பட வேண்டும். கடந்த 2018-19-ம் ஆண்டு முதல் பஞ்சாப், டெல்லி, உத்தரபிரதேசம் மற்றும் அரியானா ஆகிய 4 மாநிலங்களுக்கு வேளாண் கழிவுகளை எரிப்பதை கட்டுப்படுத்த மத்திய அரசு 3 ஆயிரத்து 138 கோடி ரூபாய் வழங்கி உள்ளது.

அதில், பஞ்சாப் மாநிலத்துக்கு ஆயிரத்து ,400 கோடியும், அரியானாவுக்கு ரூ.900 கோடியும், உத்தரபிரதேசத்துக்கு ரூ.713 கோடியும், டெல்லிக்கு ரூ.6-7 கோடியும் வழங்கப்பட்டுள்ளது. குறிப்பாக, உத்தரபிரதேசம் மற்றும் அரியானா மாநிலங்கள் நல்ல பணிகளைச் செய்து, சரியான திசையில் பயணிக்கின்றன.

விவசாய ஆராய்ச்சி அமைப்பான ஐ.சி.ஏ.ஆர்-ஆல் உருவாக்கப்பட்ட டிகம்போசர், வேளாண் கழிவுகளை எரிப்பதைக் கட்டுப்படுத்துவதில் பயனுள்ளதாக உள்ளது. மேலும், இதுபோன்ற இயந்திரங்களை மாநில அரசுகள் மற்றும் விவசாயிகள் பயன்படுத்த வேண்டும். "இவ்வாறு அவர் தெரிவித்தார்.