திருமலை,
திருப்பதி ஏழுமலையான் கோவிலில் வருடாந்திர பிரம்மோற்சவ விழா வருகிற 30-ந்தேதி மாலை கொடியேற்றத்துடன் தொடங்குகிறது. அன்று இரவு பெரிய சேஷ வாகன வீதிஉலா நடக்கிறது. விழாவையொட்டி தினமும் காலையும், மாலையும் வீதியுலா நடக்கிறது.
முக்கிய நிகழ்வாக அக்டோபர் 4-ந்தேதி இரவு 7 மணியில் இருந்து இரவு 12 மணி வரை கருட வாகன வீதிஉலா நடக்கிறது. 5-ந்தேதி காலை அனுமந்த வாகன வீதிஉலா, மாலை தங்கத்தேரோட்டம், இரவு யானை வாகன வீதிஉலா, 6-ந்தேதி காலை சூரிய பிரபை வாகன வீதிஉலா, இரவு சந்திர பிரபை வாகன வீதிஉலா, 7-ந்தேதி காலை தேரோட்டம், இரவு குதிரை வாகன வீதிஉலா, 8-ந்தேதி காலை சக்கர ஸ்நானம், இரவு கொடியிறக்கம் நடக்கிறது.
மேற்கண்ட வாகனங்களில் உற்சவர் மலையப்பசாமி தனித்தும், உபய நாச்சியார்களான ஸ்ரீதேவி, பூதேவியுடனும் சிறப்பு அலங்காரத்திலும், பிரத்யேக அவதாரத்திலும் எழுந்தருளி கோவிலின் நான்கு மாடவீதிகளில் உலா வந்து பக்தர்களுக்கு அருள் பாலிக்கின்றனர்.