மும்பை,
மும்பையில் மின்சார ரெயில் சேவை மக்களின் உயிர்நாடியாக உள்ளது. இங்கு மத்திய, மேற்கு ரெயில்வே சார்பில் மின்சார ரெயில்கள் இயக்கப்படுகின்றன. இதில் கர்ஜத், கசாரா- சி.எஸ்.எம்.டி. இடையே தினந்தோறும் 1,500-க்கும் அதிகமான மின்சார ரெயில்களை மத்திய ரெயில்வே இயக்கி வருகிறது. இதில் மட்டும் சுமார் 40 லட்சம் மக்கள் பயணம் செய்கின்றனர்.
மத்திய ரெயில்வே கடந்த 1951-ம் ஆண்டு நவம்பர் 5-ந் தேதி அமைக்கப்பட்டது ஆகும். எனவே நேற்று மத்திய ரெயில்வே தனது 70-வது ஆண்டை நிறைவு செய்து உள்ளது.
இந்தியாவின் முதல் ரெயில் மும்பை - தானே இடையே உள்ள மத்திய ரெயில்வே வழித்தடத்தில் கடந்த 1853-ம் ஆண்டு ஏப்ரல் 16-ந் தேதி இயக்கப்பட்டது குறிப்பிடத்தக்கது. தற்போது மத்திய ரெயில்வே 1,575 கி.மீ. பரந்து விரிந்து உள்ளது. இங்கு இருந்து நாட்டின் பெரும்பாலான பகுதிகளுக்கு ரெயில்கள் இயக்கப்படுகின்றன.
மும்பை, புஷாவல், நாக்பூர், சோலாப்பூர், புனே ஆகிய 5 கோட்டங்களை கொண்ட மத்திய ரெயில்வேயில் 471 ரெயில் நிலையங்கள் உள்ளன. மேலும் மத்திய பிரதேசம், கர்நாடகா மாநிலங்களில் வரையும் விரிந்து உள்ளது.