இந்தியாவில் எந்த மாநிலத்திலும் கொரோனா தடுப்பூசி பற்றாக்குறை இல்லை - சுகாதாரத்துறை செயலாளர் ராஜேஷ் பூஷண்

புதுடெல்லி,

இந்தியாவில் கடந்த ஜனவரி 16 ஆம் தேதி கொரோனா தடுப்பூசி போடும் பணி தொடங்கப்பட்டது. முதற்கட்டமாக மருத்துவர்கள், செவிலியர்கள், முன்கள பணியாளர்கள் உள்ளிட்டோருக்கு தடுப்பூசி போடப்பட்டது. இதனை தொடர்ந்து கடந்த மார்ச் 1 ஆம் தேதியில் இருந்து 60 வயதுக்கு மேற்பட்டவர்களுக்கும், 45 முதல் 59 வயதுள்ளவர்களில் இணை நோய்கள் உள்ளவர்களுக்கும் தடுப்பூசி போடும் பணி தற்போது நடைபெறுகிறது.

இன்று காலை 10 மணி நிலவரப்படி, 6 கோடியே 30 லட்சத்து 54 ஆயிரத்து 353 டோஸ் தடுப்பூசிகள் போடப்பட்டுள்ளன. தனியார் ஆஸ்பத்திரிகளில் அதிகமான கொரோனா தடுப்பூசிகள் போட்டதில் தெலுங்கானா மாநிலம் முதலிடத்தில் உள்ளது. 45 வயதை கடந்த அனைவருக்கும் தடுப்பூசி போடும் பணி, வரும் 1-ந்தேதி முதல் தொடங்குகிறது.

இந்நிலையில் டெல்லியில் சுகாதாரத்துறை செயலாளர் ராஜேஷ் பூஷண் கூறியதாவது:-

''மத்திய அரசு வழங்கும் தடுப்பூசிகளை சம்பந்தப்பட்ட மருத்துவமனைகளுக்கு உடனடியாக அனுப்ப வேண்டும். தடுப்பூசிகள் பயன்படுத்தப்படும் விவரங்களை மாநில சுகாதாரத்துறையினர் அரசின் இணையதளத்தில் பதிவிட வேண்டும். இந்தியாவில் எந்த மாநிலத்திலும் கொரோனா தடுப்பூசிக்கு பற்றாக்குறை இல்லை'' என கூறினார்.