சண்டிகர்,
அரியானா மாநிலம் குருகிராம் மாவட்டம் ஹம்ரோக் அலிபூர் என்ற கிராமம் உள்ளது. இந்த கிராமத்தின் அருகே குளம் உள்ளது.
இந்நிலையில், இந்த குளத்தில் குளிக்க அந்த கிராமத்தை சேர்ந்த சிறுவர்கள் சிலர் சென்றுள்ளனர். சிறுவர்கள் குளத்தில் குளித்துக்கொண்டிருந்தபோது எதிர்பாராத விதமாக 3 சிறுவர்கள் தண்ணீரில் மூழ்கினர். இதனால் அதிர்ச்சியடைந்த சக சிறுவர்கள் கூச்சலிட்டுள்ளனர். சிறுவர்களின் சத்தம் கேட்டு கிராமத்தினர் விரைந்து வந்து குளத்தில் மூழ்கியவர்களை காப்பாற்ற முயன்றனர். ஆனால், இந்த சம்பவத்தில் ஆஷிஷ், தேவேந்திரா, சுராஜ் ஆகிய 3 சிறுவர்களும் தண்ணீரில் மூழ்கி உயிரிழந்தனர்.
தகவலறிந்து விரைந்து சென்ற மீட்புக்குழுவினர் 3 சிறுவர்களின் உடலையும் மீட்டு பிரேத பரிசோதனைக்கு அனுப்பி வைத்தனர். மேலும், இந்த சம்பவம் குறித்து போலீசார் விசாரணை நடத்தி வருகின்றனர். குளிக்க சென்ற சிறுவர்கள் குளத்தில் மூழ்கி உயிரிழந்த சம்பவம் அப்பகுதியில் சோகத்தை ஏற்படுத்தியுள்ளது.
