நடப்பு குளிர்கால கூட்டத்தொடரில் இருந்து திரிணாமுல் காங்கிரஸ் எம்.பி. சஸ்பெண்ட்

புதுடெல்லி,

நாடாளுமன்றத்தின் மாநிலங்களவையில் இன்று தேர்தல் சட்டத்திருந்த மசோதா 2021 நிறைவேற்றப்பட்டது. இந்த மசோதா மீதான விவாதம் நடைபெற்ற போது எதிர்க்கட்சிகள் கோஷம் எழுப்பினர்.

அப்போது, எதிர்க்கட்சிகளில் ஒன்றான திரிணாமுல் காங்கிரஸ் கட்சியின் எம்.பி. டெரிக் ஒ பிரையன் அவை விதிகள் அடங்கிய புத்தகத்தை அங்கிருந்த இருக்கையில் வீசினார். அதன் பின்னர் அவர் அவையில் இருந்து வெளிநடப்பு செய்தார்.

இந்நிலையில், அவை விதிகள் புத்தகத்தை வீசி அவை நடத்தை விதிகளை மீறியதாக நடப்பு குளிர்கால கூட்டத்தொடரில் இருந்து டெரிக் ஒ பிரையன் சஸ்பெண்ட் செய்யப்பட்டுள்ளார்.

நடப்பு குளிர்கால கூட்டத்தொடர் நாளையுடன் (டிசம்பர் 22) முடிவடைய உள்ளதால் டெரிக் ஒ பிரையன் நாளை மட்டும் கூட்டத்தொடரில் பங்கேற்க முடியாது என்பது குறிப்பிடத்தக்கது.