புதுச்சேரி
ஆசிய இளைஞர் செஸ் சாம்பியன்ஷிப் போட்டியில் புதுச்சேரி சிறுவன் தங்க பதக்கம் வென்று அசத்தினான்.
3-ம் வகுப்பு மாணவன்
புதுச்சேரி ரெட்டியார்பாளையம் கம்பன் நகரைச் சேர்ந்த ராமகிருஷ்ணன்- மணிமேகலை தம்பதியின் மகன் ராகுல் ராமகிருஷ்ணன் (வயது 7). பெத்தி செமினார் சி.பி.எஸ்.இ. பள்ளியில் 3-ம் வகுப்பு படிக்கிறான்.
அண்மையில் இந்தோனேசியாவில் உள்ள பாலி தீவில் நடந்த ஆசிய யூத் செஸ் சாம்பியன்ஷிப் போட்டியில் இந்தியா சார்பில் ராகுல் கலந்துகொண்டு விளையாடினான்.
தங்க பதக்கம்
பிளிட்ஸ் பிரிவில் பங்கேற்ற ராகுல் 7 சுற்றுகளில் 6 புள்ளிகளை பெற்று தங்கப்பதக்கம் வென்று அசத்தினான். மேலும் ரேபிட் பிரிவில் வெண்கல பதக்கம் வென்றான்.
இந்த ஆண்டு விஜயவாடாவில் நடைபெற்ற எம்.பி.எல். 34-வது 8 வயதுக்கு உட்பட்டோருக்கான தேசிய ஓபன் செஸ் போட்டி மற்றும் புவனேஷ்வரில் நடைபெற்ற தேசிய பள்ளி செஸ் சாம்பியன்ஷிப் போட்டியில் முறையே 2-வது இடத்தை ராகுல் பிடித்தார்.
அடுத்த மாதம் இலங்கையில் நடைபெறவுள்ள காமன்வெல்த் செஸ் போட்டியில் இந்தியா சார்பில் ராகுல் பங்கேற்க இருப்பது குறிப்பிடத்தக்கது.