கேரள மாநிலம் குமுளியில் இருந்து மொத்தமாக லாட்டரி சீட்டுகளை விலைக்கு வாங்கி தமிழகத்திற்கு கடத்தி வருவதாக போலீசாருக்கு ரகசிய தகவல் கிடைத்தது. அதன்பேரில் தமிழக எல்லை பஸ் நிறுத்தம் பகுதியில் லோயர்கேம்ப் போலீஸ் சப்-இன்ஸ்பெக்டர் அல்போன்ஸ்ராஜா தலைமையில் போலீசார் ரோந்து பணியில் ஈடுபட்டனர். அப்போது தேனிக்கு செல்லும் பஸ் நிறுத்தத்தில் தனியாக ஒருவர் நின்று கொண்டிருந்தார். அவரை சந்தேகத்தின்பேரில் பிடித்து விசாரணை நடத்தினர். விசாரணையில் அவர் குமுளி 6-ம் மைல் பகுதியை சேர்ந்த பாபு (வயது 31) என்பதும், ரூ.81 ஆயிரத்து 600 மதிப்புள்ள லாட்டரி சீட்டுகளை இடுப்பில் மறைத்து வைத்து கடத்தி வந்ததும் தெரியவந்தது. இதையடுத்து அவரை போலீசார் கைது செய்தனர். அவரிடம் இருந்து 2 ஆயிரத்து 40 லாட்டரி சீட்டுகளை பறிமுதல் செய்தனர்.
