கடலூர் மஞ்சக்குப்பம் ராஜாம்பாள்நகரில் அமைந்துள்ள புத்துமாரியம்மன் கோவிலில் ஆடி மாத திருவிழா நேற்று முன்தினம் தொடங்கியது. தொடர்ந்து கணபதி ஹோமம், நவாக்ஷரி ஹோமம் நடந்தது. அதையடுத்து பாலவிநாயகருக்கு அபிஷேகம் மற்றும் தீபாராதனை நடந்தது. நேற்று காலை 6 மணி அளவில் புத்துமாரியம்மனுக்கு புனித நீர் கொண்டு வரப்பட்டது. மதியம் 2 மணிக்கு அம்மனுக்கு அபிஷேகம் மற்றும் மகா தீபாராதனை முடிந்து, சாகை வார்த்தல் நடந்தது. இதில் திரளான பக்தர்கள் கலந்து கொண்டு சாமி தரிசனம் செய்தனர். அதையடுத்து மாலை 3 மணிக்கு செடல் திருவிழா நடைபெற்றது. இதில் ஏராளமான பக்தர்கள் செடல் அணிந்து அம்மனுக்கு நேர்த்திக்கடன் செலுத்தினர். அதன்பிறகு கும்பம் கொட்டுதல் நிகழ்ச்சியும், பம்பை கலைக்குழுவின் சார்பில் சிறப்பு வர்ணித்தல் நிகழ்ச்சியும் நடந்தது. இரவு 8 மணிக்கு அம்மன் வீதி உலா நடைபெற்றது. இன்று (திங்கட்கிழமை) மாலை 5 மணிக்கு பிறகு திருவிளக்கு பூஜை நடக்கிறது.
