சென்னை,
கொரோனா தடுப்பு நடவடிக்கையாக ரெயில்வே வாரியம் கடந்த ஏப்ரல் மாதம், ரெயில் பயணிகளுக்கு முக கவசம் குறித்த விழிப்புணர்வு ஏற்படுத்த வேண்டும் என்று மண்டல ரெயில்வே நிர்வாகத்திற்கு உத்தரவிட்டது. அதைத்தொடர்ந்து, முக கவசம் உள்ளிட்ட கொரோனா தடுப்பு நடவடிக்கைகளை கடைப்பிடிக்காதவர்களுக்கு ரூ.500 வரை அபராதம் விதிக்க, ரெயில் நிலையங்களின் தூய்மையை பாதிக்கும் நடவடிக்கை விதிகளின் படி அதிகாரம் வழங்கியது.
அந்தவகையில் தெற்கு ரெயில்வேக்குட்பட்ட அனைத்து ரெயில்வே கோட்டங்களிலும், ரெயில்வே அதிகாரிகள் மற்றும் ரெயில்வே பாதுகாப்புப்படை வீரர்கள், ரெயில் நிலையங்களிலும், ரெயில்களிலும் முக கவசம் அணியாதவர்களுக்கு அபராதம் விதித்து வந்தது. இந்தநிலையில், தற்போது கொரோனா 2-வது அலையின் தீவிரம் தணிந்து வருவதால், ஊரடங்கில் தளர்வுகள் அளிக்கப்பட்டு இயல்பு வாழ்க்கை திரும்பி வந்து கொண்டிருக்கிறது.
கொரோனா தொற்று குறைந்து வருவதால், பொதுமக்களும் பயமின்றி முக கவசம் அணியாமல் வெளியே நடமாடிக் கொண்டிருக்கின்றனர். மேலும், ரெயில் நிலையங்களிலும், ரெயில்களிலும் பெரும்பாலானோர் முக கவசம் அணிவதில்லை. இது தொடர்பாக ரெயில்வே அதிகாரிகளுக்கு புகார்கள் அதிகளவில் வந்தது. இந்தநிலையில், கொரோனா தொற்று தடுப்பு நடவடிக்கையாக தற்போது ரெயில் நிலையங்களில் முக கவசம் அணியாதவர்களுக்கு அபராதம் விதிக்கும் நடவடிக்கையை தெற்கு ரெயில்வே தீவிரப்படுத்தி உள்ளது.
அந்தவகையில் நேற்று எழும்பூர் ரெயில் நிலையத்தில் டிக்கெட் பரிசோதகர்கள் மற்றும் ரெயில்வே பாதுகாப்புப்படையினர், முக கவசம் அணியாமல் உள்ளிட்ட கொரோனா தடுப்பு நடவடிக்கையை கடைப்பிடிக்காதவர்களுக்கு அபராதம் விதித்தனர். தெற்கு ரெயில்வேயில் ஏப்ரல் 17-ந் தேதி முதல் கடந்த 9-ந் தேதி வரை முக கவசம் அணியாத 8 ஆயிரத்து 265 நபர்களிடம் ரூ.40 லட்சத்து 92 ஆயிரத்து 500 அபராதம் வசூலிக்கப்பட்டு, இலவச முக கவசங்களும் வழங்கப்பட்டுள்ளது குறிப்பிடத்தக்கது.