விருதுநகர்,
முதல்-அமைச்சர் மு.க.ஸ்டாலின் 2 நாள் சுற்றுப்பயணமாக விருதுநகருக்கு வருகை தந்துள்ளார். இதற்காக சென்னையில் இருந்து காலையில் விமானத்தில் புறப்பட்டு, 10.30 மணி அளவில் மதுரை விமான நிலையம் வந்தடைந்தார். அங்கிருந்து காரில் விருதுநகர் புறப்பட்ட முதல்-அமைச்சருக்கு, பகல் 11 மணி அளவில் சத்திரரெட்டியபட்டி பகுதியில் பிரமாண்ட வரவேற்பு அளிக்கப்பட்டது.
அமைச்சர்கள் சாத்தூர் ராமச்சந்திரன், தங்கம் தென்னரசு ஆகியோர் தலைமையில் 60 ஆயிரம் பேர் திரண்டு, தி.மு.க. கொடியுடன் முதல்-அமைச்சரை வரவேற்றனர். இதையடுத்து சிவகாசி அருகே கன்னிச்சேரிபுதூருக்கு சென்ற முதல்-அமைச்சர் மு.க.ஸ்டாலின், அங்குள்ள பட்டாசு ஆலையை பார்வையிட்டு, பட்டாசு தொழிலாளர்களுடன் கலந்துரையாடினார். அப்போது பட்டாசு ஆலைகளில் பணிபுரியும் தொழிலாளர்களின் குறைகளை முதல்-அமைச்சர் கேட்டறிந்தார். தொடர்ந்து, பட்டாசு உற்பத்தியாளர்களை சந்திக்கும் முதல்-அமைச்சர், அதிகாரிகளுடனும் ஆலோசனை நடத்த உள்ளார்.
நாளை (ஞாயிற்றுக்கிழமை) காலை 9 மணிக்கு, ரூ.77 கோடியில் 6 தளங்களுடன் கட்டப்பட்டுள்ள விருதுநகர் கலெக்டர் அலுவலக புதிய கட்டிடத்தை திறந்து வைத்து பார்வையிடுகிறார். இதையடுத்து விருதுநகர் அருகே பட்டம்புதூரில் நலத்திட்ட உதவிகள் வழங்கும் விழாவில் பங்கேற்று 35 ஆயிரம் பேருக்கு அரசின் பல்வேறு துறைகளின் நலத்திட்ட உதவிகளை வழங்குகிறார்.