சென்னை,
கடலூரைச் சேர்ந்த பாரதிய ஜனதா கட்சியின் நிர்வாகி ஜெயக்குமார் என்பவர், சென்னை உயர்நீதிமன்றத்தில் மனு ஒன்றை தாக்கல் செய்துள்ளார். அந்த மனுவில், தமிழக அரசு அலுவலகங்களில் மகாத்மா காந்தி, நேரு, திருவள்ளுவர், அண்ணா, ராஜாஜி, பெரியார் ஆகியோரது புகைப்படங்களுடன் குடியரசு தலைவர் மற்றும் பிரதமரின் புகைப்படங்களையும் வைக்க வேண்டும் என்று 1978 ஆம் ஆண்டு அரசாணை பிறப்பிக்கப்பட்டது.
இதன் பிறகு 1990 ஆம் ஆண்டு அம்பேத்கர் புகைப்படத்தையும், 2006 ஆம் ஆண்டு பசும்பொன் முத்துராமலிங்கத்தேவர், வ.உ.சி., காயிதே மில்லத், இந்திரா காந்தி, முன்னாள் முதல்வர்கள், இந்நாள் முதல்வர் மற்றும் தமிழன்னையின் படங்களையும் வைப்பதற்கு அரசாணைகள் பிறப்பிக்கப்பட்டுள்ளது.
ஆனால் தமிழக அரசு அரசாணை பிறப்பித்தும் பெரும்பாலான அரசு அலுவலகங்களில் குடியரசு தலைவர் மற்றும் பிரதமரின் புகைப்படங்கள் புறக்கணிக்கப்பட்டுள்ளன. எனவே அரசு அலுவலகங்களில் பிரதமர், குடியரசு தலைவரின் புகைப்படங்களை வைக்க உத்தரவிட வேண்டும்.
இவ்வாறு அந்த மனுவில் அவர் கூறியிருந்தார்.
இந்த வழக்கு சென்னை உயர்நீதிமன்றத்தில் தலைமை நீதிபதி சஞ்சீப் பானர்ஜி, நீதிபதி செந்தில்குமார் ராமமூர்த்தி அடங்கிய அமர்வில் விசாரணைக்கு வந்த போது, தமிழக அரசு தரப்பில் ஆஜரான தலைமை வழக்கறிஞர் தேசிய தலைவர்களின் புகைப்படங்களை அரசு அலுவலகங்களில் வைக்க அரசாணை பிறப்பிக்கப்பட்டிருந்தாலும், புகைப்படங்களை கண்டிப்பாக வைக்க வேண்டும் என்று அந்த அரசாணைகளில் கட்டாயப்படுத்தவில்லை என்று வாதிட்டார்.
இதனை பதிவு செய்து கொண்ட நீதிபதிகள், தலைவர்களின் புகைப்படங்களை அரசு அலுவலகங்களில் வைக்க வேண்டும் என்று அரசாணை கட்டாயப்படுத்தாத நிலையில், குடியரசு தலைவர், பிரதமர் புகைப்படங்களை வைப்பது குறித்து சம்பந்தப்பட்ட அரசு அலுவலகங்கள் தான் முடிவு எடுக்க வேண்டும் என்று உத்தரவிட்டு இந்த வழக்கை முடித்து வைத்தனர்.