திருச்சி தில்லைநகரில், 10-வது மாவட்ட அளவிலான கராத்தே போட்டி நேற்று நடந்தது. இதில் மாவட்டம் முழுவதிலும் இருந்து 200-க்கும் மேற்பட்ட வீரர்-வீராங்கனைகள் கலந்து கொண்டனர். போட்டிகளை டாக்டர் செந்தில்குமார், தேசிய நடுவர் ராஜசேகர் ஆகியோர் தொடங்கி வைத்தனர். போட்டியில் வெற்றி பெற்றவர்களுக்கு சான்றிதழ் மற்றும் பதக்கங்கள் வழங்கப்பட்டன. 15 பிரிவுகளில் நடந்த இந்த போட்டியில் ஒவ்வொரு பிரிவிலும் முதலிடம் பிடித்த வீரர்-வீராங்கனைகள் அடுத்த மாதம் (ஜூலை) திருச்சியில் நடைபெறும் மாநில அளவிலான கராத்தே போட்டியில் விளையாட தேர்வு செய்யப்பட்டனர். மாநில போட்டியின் முடிவில் முதலிடம் பிடிப்பவர்கள் வருகிற டிசம்பர் மாதம் அசாமில் நடைபெறும் தேசிய கராத்தே போட்டியில் விளையாட தேர்வு செய்யப்படுவார்கள்.