பேரூராட்சி கூட்டம்
செம்பட்டி அருகே சித்தையன்கோட்டை பேரூராட்சி உள்ளது. இங்கு மொத்தம் 18 வார்டுகள் உள்ளன. இதில் பேரூராட்சி தலைவர், துணைத்தலைவர் உள்பட 15 வார்டுகளில் தி.மு.க. கவுன்சிலர்கள், ஒரு வார்டில் அ.தி.மு.க. கவுன்சிலரும், 2 வார்டுகளில் காங்கிரஸ் கவுன்சிலர்களும் உள்ளனர்.
சித்தையன்கோட்டை பேரூராட்சி கூட்டம் நடந்தது. இதற்கு பேரூராட்சி தலைவர் போதும்பொண்ணு முரளி தலைமை தாங்கினார். துணைத்தலைவர் ஜாகீர்உசேன் முன்னிலை வகித்தார். செயல் அலுவலர் சிவக்குமார் வரவேற்றார். கூட்டத்தில் நடந்த விவாதங்கள் வருமாறு:-
லாவண்யா (தி.மு.க.):- ஒவ்வொரு முறையும் கூட்டம் நடைபெறுகிறது. வரவு-செலவு கணக்குகளை காண்பிப்பது இல்லை. பேரூராட்சி பகுதியில் அடிப்படை வசதிகள் முறையாக நடைபெறுவது இல்லை. கவுன்சிலர்களின் கோரிக்கை நிறைவேற்றப்படுவதில்லை.
கவுன்சிலர்கள் வெளிநடப்பு
அப்போது, அவருக்கு ஆதரவாக தி.மு.க. கவுன்சிலர்கள் முத்துக்குமார், ரத்தினக்குமார் உள்பட 5 கவுன்சிலர்கள், பேசினர். மேலும் எங்கள் வார்டுகளிலும் எந்தப் பணியும் நடைபெறவில்லை. நிதி எங்கே செல்கிறது என்று அவர்களும் கேள்வி கேட்டனர். அ.தி.மு.க. கவுன்சிலர் காவிந்தசாமியும் தனது வார்டில் பணி ஏதும் நடைபெறவில்லை என்றார்.
செயல் அலுவலர்:- நிதி இருந்தால் தான் செய்ய முடியும். நிதி இல்லை என்றால் செய்ய முடியாது.
இதனால் ஆத்திரமடைந்த, தி.மு.க. கவுன்சிலர்கள், செயல் அலுவலரிடமும், துணைத்தலைவரிடமும் கடும் வாக்குவாதத்தில் ஈடுபட்டனர். பின்னர் கூட்டத்தில் இருந்து 6 தி.மு.க. கவுன்சிலர்கள், அ.தி.மு.க. கவுன்சிலர் கோவிந்தசாமி ஆகியோர் வெளிநடப்பு செய்தனர். இதனால் அங்கு பெரும் பரபரப்பு ஏற்பட்டது. உடனே துணைத்தலைவர் வெளியே சென்று கவுன்சிலர்களை சமாதானப்படுத்தினார். இதையடுத்து அவர்கள் கூட்ட அரங்குக்குள் வந்தனர். தொடர்ந்து கூட்டம் நடைபெற்றது. அதில் பல்வேறு தீர்மானங்கள் நிறைவேற்றப்பட்டன.