மதுரை பெத்தானியாபுரம் பாத்திமா நகர் பகுதியில் அமைந்துள்ள புனித பாத்திமா அன்னை ஆலய 42-வது ஆண்டு திருவிழா நேற்று கொடியேற்றத்துடன் தொடங்கியது. மதுரை செயின்ட் ஜான்ஸ் மெட்ரிக் பள்ளியின் முதல்வர் பாதிரியார் மகிழ்ச்சி மன்னன் திருவிழா கொடியை ஏற்றி வைத்து சிறப்பு திருப்பலி நிறைவேற்றி விழாவை தொடங்கி வைத்தார். 27-ந்தேதி வரை தினமும் மாலை 6 மணிக்கு ஜெபமாலை வழிபாடு மற்றும் பல்வேறு தலைப்புகளில் பல்வேறு பகுதிகளை சேர்ந்த அருட்தந்தையர்கள் மறையுரையாற்றி சிறப்பு திருப்பலி நிறைவேற்றுகிறார்கள். ஒவ்வொரு நாளும் ஒவ்வொரு அன்பியங்களை சேர்ந்தவர்கள் நவநாள் திருப்பலி செய்கிறார்கள். விழாவின் முக்கிய நிகழ்வாக 27-ந் தேதி மாலை திருவிழா சிறப்பு திருப்பலியும் அதனை தொடர்ந்து பாத்திமா அன்னையின் உருவம் தாங்கிய தேர் பவனி நடைபெறுகிறது. 28-ந்தேதி மாலை 4.30 மணிக்கு திருப்பலி நிறைவேற்றப்பட்டு கொடி இறக்கப்பட்டு திருவிழா நிறைவு பெறுகிறது விழா ஏற்பாடுகளை ஆலய நிர்வாக குழுவினர் மற்றும் பாத்திமா நகர் பகுதி இறை மக்கள் அன்பியங்கள், மகளிர் மன்றம், இளையோர் அமைப்பினர் செய்து வருகின்றனர்.