முதலாமாண்டு வகுப்பு
தமிழகத்தில் அரசு கலை மற்றும் அறிவியல் கல்லூரிகளில் முதலாமாண்டு மாணவர்களுக்கு வகுப்புகள் இன்று முதல் தொடங்கியது. அந்த வகையில் புதுக்கோட்டை மாவட்டத்திலும் அரசு கலை மற்றும் அறிவியல் கல்லூரிகளில் முதலாமாண்டு மாணவர்களுக்கு வகுப்புகள் தொடங்கின. மாணவ-மாணவிகள் மிகுந்த ஆர்வமுடன் கல்லூரிக்கு வந்தனர்.
புதுக்கோட்டையில் மன்னர் கல்லூரி, அரசு மகளிர் கலை மற்றும் அறிவியல் கல்லூரிகளில் முதலாமாண்டு மாணவ-மாணவிகளை அந்தந்த துறை பேராசிரியர்கள் வரவேற்றனர். பள்ளிப்படிப்பை முடித்து விட்டு கல்லூரி படிப்பை தொடங்கியதை எண்ணி அவர்கள் மகிழ்ச்சி அடைந்தனர். ஒரு சில மாணவ, மாணவிகளை பெற்றோர் அழைத்து வந்து கல்லூரியில் விட்டு சென்றதை பார்க்க முடிந்தது. மாணவ-மாணவிகளை வாழ்த்தி அவர்கள் அனுப்பி வைத்தனர்.
அறிவுரைகள்
கல்லூரியில் முதல் நாளில் மாணவ-மாணவிகளுக்கு அறிவுரைகள் வழங்கப்பட்டன. கல்லூரியில் வகுப்பிற்கான நேரம் மற்றும் பாடங்கள் பற்றியும், ஒழுக்கத்தை கடைப்பிடித்தல், நேரம் தவறாமல் கல்லூரிக்கு வருதல், கல்லூரியின் விதிமுறைகள், ஒழுங்கீன செயல்களில் ஈடுபட கூடாது என்பது உள்பட அறிவுரைகளை பேராசிரியர்கள் வழங்கினர். மாணவ-மாணவிகளும் அறிவுரைகளை கேட்டுக்கொண்டனர்.
ஒருவருக்கொருவர் அன்பை பகிந்து அறிமுகமாகி கொண்டனர். பேராசிரியர்களும் மாணவ-மாணவிகளை வாழ்த்தி நல்ல முறையில் கல்வி கற்க அறிவுறுத்தினர். கல்லூரியில் முதல் நாள் முடிந்ததும் அவர்கள் முக மகிழ்ச்சியோடு சென்றனர்.