நாமக்கல் மண்டலத்தில் கறிக்கோழி கிலோ ரூ.102-க்கு விற்பனை செய்யப்பட்டு வந்தது. இந்த நிலையில் நேற்று பல்லடத்தில் நடந்த கறிக்கோழி ஒருங்கிணைப்புக்குழு கூட்டத்தில் அதன் விலையை அதிரடியாக கிலோவுக்கு ரூ.14 குறைக்க முடிவு செய்தனர். எனவே கறிக்கோழி விலை கிலோ ரூ.88 ஆக சரிவடைந்துள்ளது.
முட்டை கொள்முதல் விலை 565 காசுகளாகவும் முட்டைக்கோழி விலை கிலோ ரூ.92 ஆகவும் நீடித்து வருகிறது. அவற்றின் விலைகளில் மாற்றம் செய்யப்படவில்லை. தைப்பூசம் நெருங்கி வருவதால் தமிழகத்தில் கறிக்கோழி விற்பனை சரிவடைய தொடங்கி உள்ளது. எனவே விற்பனையை அதிகரிக்க கறிக்கோழி விலை குறைக்கப்பட்டு இருப்பதாக பண்ணையாளர்கள் தெரிவித்தனர்.
