மார்கழி மாதத்தையொட்டி தமிழ்நாடு அரசு போக்குவரத்து கழகம் நெல்லை மண்டலம் சார்பில் நெல்லை மற்றும் தூத்துக்குடி மாவட்டங்களில் உள்ள நவ கைலாய கோவில்களுக்கு ஞாயிற்றுக்கிழமை தோறும் சிறப்பு பஸ்கள் இயக்கப்பட்டு வருகிறது.
அதன்படி கடந்த 18-ந்தேதி முதல் இந்த சிறப்பு பஸ்கள் இயக்கப்பட்டு வருகிறது. நெல்லை புதிய பஸ்நிலையத்தில் இருந்து கடந்த வாரம் முன்பதிவு மற்றும் பயணிகள் வருகை அடிப்படையில் 4 பஸ்கள் இயக்கப்பட்டது.
இந்த நிலையில் நேற்று பள்ளி மாணவ-மாணவிகளுக்கு அரையாண்டு தேர்வு விடுமுறை அளிக்கப்பட்டு உள்ளதால் கூடுதலாக பயணிகள் நவ கைலாய கோவில்களுக்கு செல்ல முன்பதிவு செய்திருந்தனர்.
இதையொட்டி நேற்று கூடுதலாக 2 பஸ்கள் இயக்கப்பட்டது. நெல்லை புதிய பஸ்நிலையத்தில் இருந்து புறப்பட்டு பாபநாசம், சேரன்மாதேவி, கோடகநல்லூர், குன்னத்தூர், முறப்பநாடு, ஸ்ரீவைகுண்டம், தென்திருப்பேரை, ராஜபதி, புன்னக்காயல் ஆகிய 9 கோவில்களுக்கு பஸ்களில் பக்தர்களை அழைத்து சென்று, மீண்டும் நெல்லை புதிய பஸ்நிலையத்தில் இரவு கொண்டுவந்துவிட்டனர். தொடர்ந்து வருகிற 1-ந்தேதி மற்றும் 8-ந்தேதி ஞாயிற்றுக்கிழமைகளிலும் நவ கைலாய கோவில்களுக்கு சிறப்பு பஸ்கள் இயக்கப்படுகிறது.