நிலவின் தென்துருவத்தில் 'சிவசக்தி' பகுதியில் பள்ளத்தால் பாதையை மாற்றிய ரோவர் -இஸ்ரோ தகவல்

சென்னை,

இந்திய விண்வெளி ஆராய்ச்சி நிறுவனம் (இஸ்ரோ) விண்வெளித்துறையில் பல்வேறு வியக்கத்தக்க ஆராய்ச்சியில் ஈடுபட்டு வருகிறது. குறிப்பாக மங்கள்யான், சந்திரயான் மற்றும் ககன்யான் உள்ளிட்ட பல்வேறு திட்டங்களின் மூலம் ஆராய்ச்சியில் இஸ்ரோ ஈடுபட்டு வருகிறது. நிலவு குறித்த ஆய்வில் சந்திரயான்-1 மற்றும் சந்திரயான்-2 விண்கலன்களை அனுப்பி நிலவில் இருந்து பல்வேறு தரவுகளை சேகரித்துள்ளது.

இந்தநிலையில், கடந்த மாதம் 14-ந்தேதி சந்திரயான்-3 விண்கலத்தை விண்ணில் செலுத்தியது. 40 நாட்கள் வெற்றி பயணத்தை முடித்து கொண்டு கடந்த 23-ந்தேதி சந்திரயான்-3 விண்கலத்தில் இருந்த லேண்டர் நிலவின் தென்துருவத்தில் தரையிறங்கியது.

இதில் இருந்து வெளியேறிய ரோவர் கருவி நிலவின் மேற்பரப்பில் 'சிவசக்தி' பகுதியில் இருந்து ஊர்ந்து சென்று பல்வேறு ஆய்வுகளில் ஈடுபட்டு வருகிறது.

பள்ளத்தை உணர்ந்த ரோவர்

பெங்களூருவில் உள்ள தரை கட்டுப்பாட்டு மையத்தில் இருந்து இஸ்ரோ விஞ்ஞானிகள் பிரக்யான் ரோவரின் செயல்பாடுகள் மற்றும் அதில் இருந்து பெறப்படும் தரவுகளையும் பெற்று வருகின்றனர். குறிப்பாக நிலவின் தென் துருவத்தில் வெப்ப நிலை எப்படி உள்ளது? என்பதை நேற்று முன்தினம் ஆய்வு செய்து வெளியிட்டது.

இந்த நிலையில், பிரக்யான் ரோவர் தனக்கு முன்னாள் உள்ள ஒரு பெரிய பள்ளத்தை உணர்ந்து பாதையை மாற்றியது. பிரக்யான் ரோவரால் 5 மீட்டர் தொலைவில் உள்ளவற்றை உணர முடியும் என்ற நிலையில் 3 மீட்டர் தொலைவில் உள்ள பள்ளம் இருப்பதை உணர்ந்தது. மேடான பகுதியை கடக்கக்கூடிய வகையில் பிரக்யான் ரோவரில் தொழில் நுட்ப வசதிகள் செய்யப்பட்டு உள்ளன.

4 மீட்டர் பள்ளம் தனது பாதையில் இருந்ததால் பாதையை மாற்றிய சந்திரயான் பிரக்யான் ரோவர் தற்போது புதிய பாதையில் பாதுகாப்பாக பயணித்து வருகிறது. லேண்டரில் இருந்து ரோவர் 500 மீட்டர் பயணிக்க முடியும் என்ற நிலையில் 8-10 மீட்டர் வரை உள்ள தொலைவில் ரோவர் உள்ளது என்று இஸ்ரோ விஞ்ஞானிகள் கூறினர்.