சென்னை,

தமிழக முதல்-அமைச்சர் மு.க.ஸ்டாலின் இன்று (ஞாயிற்றுக்கிழமை) கிருஷ்ணகிரி மாவட்டத்திற்கு சென்றார். முன்னதாக சென்னையில் இருந்து தனி விமானம் மூலம் ஓசூர் பேளகொண்டப்பள்ளியில் உள்ள தனேஜா விமான ஓடுதளத்துக்கு சென்றடைந்தார்.

அங்கு அவருக்கு மாவட்ட நிர்வாகம் சார்பில் வரவேற்பு அளிக்கப்பட்டது. இதைத்தொடர்ந்து அங்கிருந்து காரில் புறப்பட்ட அவருக்கு கிருஷ்ணகிரி சுங்கச்சாவடி அருகே கிழக்கு மாவட்ட தி.மு.க. சார்பில் சிறப்பான வரவேற்பு அளிக்கப்பட்டது.

அதைத்தொடர்ந்து கிருஷ்ணகிரியில் ராயக்கோட்டை ரோடு மேம்பாலத்தில் இருந்து முதல்-அமைச்சரின் ரோடு ஷோ நிகழ்ச்சி தொடங்கியது. இந்த ரோடு ஷோ ராயக்கோட்டை மேம்பாலம், அண்ணா சிலை, பெங்களூரு சாலை வழியாக ஆர்.சி.பள்ளி ஜங்ஷன், மாவட்ட தி.மு.க. அலுவலகம் வழியாக 5 ரோடு ரவுண்டானாவை அடைந்தது.

அங்கிருந்து சென்னை சாலை பெரிய மாரியம்மன் கோவில் ஜங்ஷனுக்கு சென்ற முதல்-அமைச்சர், அங்கிருந்து சென்னை பைபாஸ் ரோடு வரையில் சென்று, பொதுமக்களை சந்தித்தார். தொடர்ந்து அவர் கிருஷ்ணகிரியில் சென்னை சாலையில் உள்ள அரசு ஆடவர் கலைக்கல்லூரியில் நடைபெற்ற பிரமாண்ட அரசு விழாவிற்கு சென்றார். அங்கு முதல்-அமைச்சர் மு.க.ஸ்டாலின் காவல் துறையினரின் அணிவகுப்பு மரியாதையை ஏற்றுக்கொண்டார்.

தொடர்ந்து புத்தகங்கள் வழங்கி வரவேற்கும் நிகழ்ச்சி நடைபெற்றது. அதன் தொடர்ச்சியாக விழா மேடை அருகில் அமைக்கப்பட்டிருந்த சிறப்பு கண்காட்சி அரங்குகளை முதல்-அமைச்சர் பார்வையிட்டார். மேலும் மாற்றுத்திறனாளிகளுக்கு நலத்திட்ட உதவிகளை வழங்கி அவர்களுடன் கலந்துரையாடினார்.

தொடர்ந்து விழா மேடைக்கு வந்த முதல்-அமைச்சரை கலெக்டர் தினேஷ்குமார் வரவேற்று பேசினார். அதன் பின்னர் முதல்-அமைச்சர் ரூ.2,885 கோடி மதிப்பிலான புதிய திட்டப்பணிகளுக்கு அடிக்கல் நாட்டி, முடிவுற்ற திட்டப்பணிகளை திறந்து வைத்தார்.

தமிழ்நாட்டிலேயே முதல் முறையாக கிருஷ்ணகிரி மாவட்டத்தில் இன்று நடைபெற்ற அரசு விழாவில், 85 ஆயிரத்து 711 பேருக்கு வீட்டுமனை பட்டாக்களை முதல்-அமைச்சர் மு.க.ஸ்டாலின் வழங்கியுள்ளார் என்பது குறிப்பிடத்தக்கது.