கஜா புயலால் பாதிக்கப்பட்ட மாவட்டங்களில் துப்புரவு பணியில் ஈடுபட்ட பணியாளர்களுக்கு ரூ.1,000 மதிப்பூதியம் பரிசு பெட்டகமும் அறிவிப்பு

சென்னை

தமிழக உள்ளாட்சித்துறை அமைச்சர் எஸ்.பி.வேலுமணி வெளியிட்ட தகவல் வருமாறு:-

கஜா புயலால் கடுமையாக பாதிக்கப்பட்ட தஞ்சை, நாகை, திருவாரூர் மற்றும் புதுக்கோட்டை ஆகிய மாவட்டங்களில் துப்புரவு பணிகளை மேற்கொள்ள பல்வேறு மாவட்டங்களுக்கு உட்பட்ட மாநகராட்சிகள், மற்றும் நகராட்சிகளில் இருந்து 2 ஆயிரத்து 400 பணியாளர்கள், பேரூராட்சிகளில் இருந்து 1,624 பணியாளர்கள், ஊரக வளர்ச்சித் துறையில் இருந்து 3 ஆயிரத்து 60 பணியாளர்கள் என மொத்தம் 7 ஆயிரத்து 84 துப்புரவு பணியாளர்கள் தூய்மைப் பணிகளில் ஈடுபட்டுள்ளனர். இந்த துப்புரவு பணியாளர்கள் கடும் பாதிப்படைந்த சூழ்நிலையிலும், உள்ளூர் மக்களுடன் இணைந்து சிறப்பாக தூய்மை பணிகளை மேற்கொண்டனர்.

இப்பணிகளில் ஈடுபட்ட துப்புரவு பணியாளர்களை பாராட்டும் விதமாக அவர்களுக்கு மதிப்பூதியம் வழங்க முதல்-அமைச்சர் எடப்பாடி பழனிசாமி ஆணையிட்டார். அதன்படி ஒவ்வொரு துப்புரவு பணியாளர்களுக்கும் தலா ரூ.1,000 சிறப்பு ஊக்கத்தொகையும், அரிசி, போர்வை, லுங்கி உள்பட 16 வகையான பொருட்கள் அடங்கிய பரிசு பெட்டகம் ஒன்றும் வழங்கப்படும்.

இவ்வாறு அவர் கூறியுள்ளார்.