சென்னை ஆயிரம் விளக்கு பகுதியில் நேற்று முன்தினம் மாலை சாலையில் நடந்து சென்ற சுதீப் முகர்ஜி என்ற வாலிபரிடமும், 17 வயது சிறுவனிடமும் அடுத்தடுத்து செல்போன்களை பறித்துக்கொண்டு மோட்டார் சைக்கிளில் 2 கொள்ளையர்கள் தப்பிச்சென்றனர். அவர்களை அந்த வழியாக மோட்டார் சைக்கிளில் வந்த போலீசார் இருவர் விரட்டிச்சென்றனர்.
சுமார் 3 கிலோ மீட்டர் தூரம் விரட்டிச்சென்று கொள்ளையர்களில் ஒருவரை போலீசார் மடக்கிப்பிடித்தனர். இன்னொரு கொள்ளையன் தப்பி ஓடிவிட்டார். பிடிபட்ட கொள்ளையன் பெயர் விவேக் (வயது 27). தேனாம்பேட்டையைச்சேர்ந்தவர். அவரை ஆயிரம்விளக்கு போலீசார் கைது செய்தனர். அவரிடம் இருந்து 2 செல்போன்கள் மீட்கப்பட்டது. அவர் பயன்படுத்திய மோட்டார் சைக்கிள், வேளச்சேரியில் திருடியது, என்பது தெரிய வந்தது. மோட்டார் சைக்கிளும் பறிமுதல் செய்யப்பட்டது.
தப்பி ஓடிய கொள்ளையன் பெயர் விஷ்ணு என்பதாகும். போரூரைச் சேர்ந்த அவரை போலீசார் தேடி வருகிறார்கள். 3 கிலோ மீட்டர் தூரம் விரட்டிச்சென்று கொள்ளையன் விவேக்கை பிடித்த போலீஸ்காரர்கள் பெயர் தினேஷ், சரவணன் என்பதாகும். இருவரும் அபிராமபுரம் போலீஸ் நிலையத்தில் பணியாற்றுகின்றனர். அவர்களுக்கு உயர் அதிகாரிகள் பாராட்டு தெரிவித்தனர்.