இரண்டு நாட்களாக குறைந்து வரும் தங்கத்தின் விலை

சென்னை,

தங்கம் விலை கடந்த மாத தொடக்கத்தில் இருந்து ஏற்ற இறக்கத்துடன் இருந்து வருகிறது. தங்கத்தின் மீதான சுங்கவரி குறைக்கப்படும் என கடந்த 1-ந் தேதி பட்ஜெட்டில் அறிவிக்கப்பட்டது. இந்த அறிவிப்பால் தங்கம் விலை குறையும் என்று பேசப்பட்டது. அதேபோல், கடந்த 2 நாட்களாக தங்கம் விலை சரிந்துகொண்டே வருகிறது.

நேற்று முன்தினம் ஒரு கிராம் தங்கம் ரூ.4 ஆயிரத்து 565-க்கும், ஒரு பவுன் ரூ.36 ஆயிரத்து 520-க்கும் விற்பனை ஆனது. நேற்று மாலை நேர நிலவரப்படி, கிராமுக்கு ரூ.36-ம், பவுனுக்கு ரூ.288-ம் குறைந்து, ஒரு கிராம் ரூ.4 ஆயிரத்து 529-க்கும், ஒரு பவுன் ரூ.36 ஆயிரத்து 232-க்கும் விற்பனை செய்யப்பட்டது. சுங்கவரி குறைக்கப்பட்ட பிறகு, கடந்த 2 நாட்களில் மட்டும் தங்கம் விலை பவுனுக்கு ரூ.768 குறைந்துள்ளது.

வெள்ளி விலையும் மளமளவென குறைந்துகொண்டே வருகிறது. நேற்று கிராமுக்கு 2 ரூபாய் 10 காசும், கிலோவுக்கு ரூ.2 ஆயிரத்து 100-ம் குறைந்து, ஒரு கிராம் 73 ரூபாய் 20 காசுக்கும், ஒரு கிலோ ரூ.73 ஆயிரத்து 200-க்கும் விற்பனை ஆனது.