வேன் டிரைவர்
திண்டுக்கல் மாவட்டம் ஒட்டன்சத்திரம் அருகே உள்ள டி.குளத்துப்பட்டியை சேர்ந்தவர் வீரப்பன் (வயது 33). வேன் டிரைவர். இவர் ஒட்டன்சத்திரத்தை சேர்ந்த செழியன் என்பவருக்கு சொந்தமான வேனை ஓட்டி வந்தார்.
இந்த நிலையில் கடந்த 13-ந் தேதி ஒட்டன்சத்திரத்தில் இருந்து காய்கறிகளை ஏற்றிக்கொண்டு கேரளாவுக்கு வீரப்பன் வேனை ஓட்டி சென்றார். வேனில் கிளீனராக ஒட்டன்சத்திரத்தை சேர்ந்த கவுதம் உடன் இருந்தார்.
பின்னர் கேரளாவில் காய்கறியை இறக்கி விட்டு, ரூ.1 லட்சத்து 27 ஆயிரத்து 980-ஐ பெற்றுக் கொண்டு ஒட்டன்சத்திரத்துக்கு திரும்பி வந்து கொண்டிருந்தனர். அப்போது பெரியகுளம் அருகே தேனி-திண்டுக்கல் பைபாஸ் சாலை ஓரத்தில் வேனை நிறுத்தி வீரப்பன் சிறுநீர் கழித்தார்.
பணம் கொள்ளை
அப்போது அங்கு வந்த 2 மர்ம நபர்கள் வீரப்பனிடம் கத்தியை காட்டி மிரட்டி அவரிடம் இருந்த ரூ.300 பறித்துக் கொண்டனர். பின்னர் வேனில் வைத்திருந்த ரூ.1 லட்சத்து 27 ஆயிரத்து 980-யையும் கொள்ளையடித்து விட்டு தப்பி சென்றனர்.
இதுகுறித்து தென்கரை போலீஸ் நிலையத்தில் வீரப்பன் புகார் கொடுத்தார். அதன் பேரில் போலீசார் வழக்குப்பதிவு செய்து பணம் கொள்ளையடித்து சென்ற 2 மர்ம நபர்களை வலைவீசி தேடி வருகின்றனர்.