* ஒடிசாவை பந்தாடிய பானி புயல், வங்காளதேசத்தை நேற்று பதம் பார்த்தது. இந்தப் புயலில் 14 பேர் பலியாகினர். கடலோர பகுதிகளில் ஆயிரக்கணக்கான வீடுகள் சேதம் அடைந்தன.
* காசா முனையில் நேற்று முன்தினம் இஸ்ரேல் எடுத்த ராணுவ நடவடிக்கையில் 3 பாலஸ்தீனர்கள் பலியாகினர். அவர்களில் 2 பேர் ஹமாஸ் இயக்கத்தினர். அதைத் தொடர்ந்து காசா முனையில் இருந்து நேற்று இஸ்ரேலை நோக்கி 50 ராக்கெட்டுகள் வீசப்பட்டன. இதனால் அங்கு பதற்றமான சூழல் நிலவுகிறது.
* அமெரிக்காவில் நடந்த நாடாளுமன்ற தேர்தலின்போது, விதிமுறைகளை மீறிய குற்றச்சாட்டில் கென்னத் ஸ்மக்ளர் என்ற அரசியல் ஆலோசகருக்கு 1 ஆண்டு சிறைத்தண்டனை விதிக்கப்பட்டுள்ளது.
* ஈரான் நாட்டில் மின் உற்பத்தி தேவைக்கான 4 அணு உலைகள் 90 நாட்கள் செயல்படுவதற்கு அமெரிக்காவின் டிரம்ப் நிர்வாகம் அனுமதி அளித்துள்ளது.
* ஐக்கிய அரபு அமீரகத்துக்கும், பக்ரைனுக்கும் அமெரிக்கா 5 பில்லியன் டாலருக்கும் அதிகமான (சுமார் ரூ.35 ஆயிரம் கோடி) பேட்ரியாட் ஏவுகணைகளை விற்பனை செய்ய உள்ளது. இதற்கான ஒப்புதலை அந்த நாட்டின் வெளியுறவு அமைச்சகம் அளித்துள்ளது.
* வெனிசூலா நாட்டில் நிலவி வருகிற அரசியல் குழப்பம், பொருளாதார நெருக்கடி உள்ளிட்டவை குறித்து அமெரிக்க ஜனாதிபதி டிரம்பும், ரஷிய அதிபர் விளாடிமிர் புதினும் தொலைபேசியில் தொடர்பு கொண்டு பேசி ஆலோசனை நடத்தினர். இந்தப் பேச்சு நல்ல முறையில் நடந்துள்ளதாக டிரம்ப் குறிப்பிட்டார்.