வாஷிங்டன்,
அமெரிக்காவின் சான்பிரான்சிஸ்கோவில் நேற்று நடைபெற்ற 'ஏபிஇசி' (அபெக்) பொருளாதார உச்சி நாடுகளின் தலைவர்கள் கூட்டத்தில் சீன அதிபர் ஜி ஜின்பிங்கும், அமெரிக்க அதிபர் ஜோ பைடனும் சந்தித்துக் கொண்டனர். இந்த சந்திப்பின் போது, இரு தலைவர்களும் ரஷ்யா உக்ரைன் போர், இஸ்ரேல் ஹமாஸ் போர் குறித்தும், சர்வதேச விவகாரங்கள் குறித்தும் ஆலோசனை நடத்தினர்.
சந்திப்புக்கு பிறகு செய்தியாளர்களுக்கு அமெரிக்க அதிபர் ஜோ பைடன் பேட்டி அளித்தார். அப்போது, செய்தியாளர்கள் அவரிடம், சீன அதிபரை இன்னும் சர்வாதிகாரியாகத்தான் நீங்கள் கருதுகிறீர்களா? எனக் கேட்டனர். இதற்கு பதிலளித்த ஜோ பைடன், 'ஜி ஜின்பிங், கம்யூனிச நாட்டை வழிநடத்தும் ஒரு சர்வாதிகாரி' என்றார்.
மேலும், சீன அரசாங்கம் பிற நாடுகளுடன் ஒப்பிடும் போது முற்றிலும் மாறுபட்டது என்றார். கடந்த சில மாதங்களுக்கு முன்பு சீன அதிபரை சர்வாதிகாரி என்று விமர்சித்து இருந்த ஜோ பைடன், தற்போது அவரை நேரில் சந்தித்த பிறகும் தனது நிலைப்பாட்டை மாற்றாமல் விமர்சித்து இருப்பது கவனிக்கத்தக்கது.