சியோல்,
கொரிய தீபகற்பத்தில் வடகொரியாவின் தொடர் ஏவுகணை சோதனைகளால் பதற்றம் நிலவி வருகிறது. இதனால் தங்களது பாதுகாப்பு கருதி தென்கொரியா, ஜப்பான் மற்றும் அமெரிக்கா ஆகிய நாடுகள் கூட்டுப்போர் பயிற்சியில் அவ்வப்போது ஈடுபடுகின்றன. மேலும் வருகிற 2027-ம் ஆண்டுக்குள் ராணுவ பொருட்களை ஏற்றுமதி செய்யும் உலகின் 4-வது பெரிய நாடாக மாறுவதை தென்கொரியா நோக்கமாக கொண்டு செயல்படுகிறது. அதன் ஒருபகுதியாக 2 ஆண்டுகளுக்கு ஒருமுறை பெரிய அளவிலான ராணுவ கண்காட்சியை தென்கொரியா நடத்தி வருகிறது.
அதன்படி இந்த ஆண்டுக்கான ராணுவ கண்காட்சி சியோல் ஏ.டி.எக்ஸ்-2023 என்ற பெயரில் சியோங்னாம் அருகே உள்ள விமான தளத்தில் நேற்று (செவ்வாய்க்கிழமை) தொடங்கியது. வருகிற 22-ந் தேதி (ஞாயிற்றுக்கிழமை) வரை நடைபெறும் இந்த கண்காட்சியில் அமெரிக்கா, கனடா, பிரேசில் உள்ளிட்ட 55 நாடுகளின் ராணுவ உயர் அதிகாரிகள் கலந்து கொண்டனர். 200-க்கும் மேற்பட்ட வெளிநாட்டு நிறுவனங்களும் இதில் பங்கு பெற்றுள்ளன.