வாஷிங்டன்,
கொரோனா வைரஸ் பாதிப்பில் உலக அளவில் அமெரிக்கா தொடர்ந்து முதல் இடத்தில் இருந்து வருகிறது. அங்கு வைரஸ் பாதித்தவர்களின் எண்ணிக்கை 55 லட்சத்தை நோக்கி சென்று கொண்டிருக்கிறது. அதே போல் கொரோனா பலி எண்ணிக்கை இன்னும் சில தினங்களில் 2 லட்சத்தை எட்டும் நிலை உள்ளது.
இந்த நிலையில் அமெரிக்காவில் கொரோனா பாதிப்புகளை அதிகம் கொண்ட முதல் மாகாணமான கலிபோர்னியாவில் தொற்று பாதித்தவர்களின் எண்ணிக்கை 6 லட்சத்தை கடந்து விட்டது.
அங்கு நேற்று ஒரே நாளில் 7 ஆயிரத்து 934 பேருக்கு வைரஸ் தொற்று உறுதி செய்யப்பட்டது. இதன் மூலம் மொத்த பாதிப்பு எண்ணிக்கை 6 லட்சத்து 1,075 ஆக அதிகரித்துள்ளது. பலி எண்ணிக்கை 10 ஆயிரத்து 996 ஆக உள்ளது.
கலிபோர்னியா மாகாணத்தில் 1 கோடி மக்கள் தொகையை கொண்ட லாஸ் ஏஞ்சல்ஸ் நகரம்தான் கொரோனாவால் அதிகம் பாதிக்கப்பட்டுள்ளது.
அங்கு மட்டுமே இதுவரை 2 லட்சத்து 18 ஆயிரத்து 693 பேர் கொரோனாவால் பாதிக்கப்பட்டுள்ளனர். 5 ஆயிரத்து 214 பேர் உயிரிழந்துள்ளனர்.