இஸ்ரேல்- ஹிஸ்புல்லா போர் நிறுத்த ஒப்பந்தம்: இங்கிலாந்து பிரதமர் வரவேற்பு

லண்டன்,

இஸ்ரேல் மற்றும் ஹிஸ்புல்லா இடையில் போர் நிறுத்த ஒப்பந்தம் செய்யப்பட்டுள்ளதற்கு இங்கிலாந்து பிரதமர் கெய்ர் ஸ்டார்மர் வரவேற்பு தெரிவித்துள்ளார்.

இதுதொடர்பாக அவர் வெளியிட்டுள்ள அறிக்கையில் கூறியிருப்பதாவது:-

இஸ்ரேலுக்கும் லெபனானின் ஹிஸ்புல்லா அமைப்பினருக்கும் இடையே நீண்ட காலமாக போர் நீடித்து வரும்நிலையில், இன்று உறுதி செய்யப்பட்டுள்ள போர்நிறுத்தம் ஒப்பந்தம், லெபனான் மற்றும் வடக்கு இஸ்ரேலின் குடிமக்களுக்கு ஓரளவு நிவாரணம் அளிக்கும். அவர்கள் கடந்த சில மாதங்களாக அழிவுகரமான மோதல்களின் போது நினைத்துப் பார்க்க முடியாத விளைவுகளை சந்தித்துள்ளனர்.

இப்போது, இந்த ஒப்பந்தம் லெபனானில் ஒரு நீடித்த அரசியல் தீர்வாக மாற்றப்பட வேண்டும், இது பாதுகாப்பு கவுன்சில் தீர்மானம் 1701 இன் அடிப்படையில், குடிமக்கள் தங்கள் வீடுகளுக்கு நிரந்தரமாக திரும்பவும், எல்லையின் இருபுறமும் உள்ள சமூகங்கள் மீண்டும் கட்டமைக்கவும் அனுமதிக்கும்.

மத்திய கிழக்கில் நீண்ட கால, நிலையான அமைதியைப் பின்தொடர்வதற்காக நடந்து வரும் வன்முறைச் சுழற்சியை உடைப்பதற்கான முயற்சிகளில் இங்கிலாந்தும் அதன் நட்பு நாடுகளும் தொடர்ந்து முன்னணியில் இருக்கும். காசாவில் போர்நிறுத்த ஒப்பந்தம், பணயக்கைதிகள் அனைவரையும் விடுவித்தல் மற்றும் மிகவும் அவசியமான மனிதாபிமான உதவிகளுக்கான கட்டுப்பாடுகளை நீக்குதல் ஆகியவற்றை நோக்கி உடனடி முன்னேற்றத்தைக் காண வேண்டும்.

இவ்வாறு அதில் தெரிவிக்கப்பட்டுள்ளது.

முன்னதாக இஸ்ரேலிய பிரதம மந்திரி பெஞ்சமின் நெதன்யாகு மற்றும் அமெரிக்க ஜனாதிபதி ஜோ பைடன் ஆகியோர் தங்களது தனித்தனி உரைகளில், இஸ்ரேல் மற்றும் ஹிஸ்புல்லா ஆகியவை போர்நிறுத்த ஒப்பந்தத்திற்கு ஒப்புக்கொண்டதாக அறிவித்திருந்தது குறிப்பிடத்தக்கது.