பழங்களை மட்டுமே உணவாக உண்பது உயிருக்கு அச்சுறுத்தலாக மாறுமா?

3 வேளையும் பழங்களை மட்டுமே உணவாக உட்கொள்வது உயிருக்கு அச்சுறுத்தலாக மாறிவிடும். பழங்களில் அத்தியாவசிய புரதம் மற்றும் கொழுப்புகள் இல்லாததால், விரைவில் பசி ஏற்பட வழிவகுக்கும். உடலுக்கு போதுமான ஆற்றலை வழங்காமல் போகலாம்.

எனவே காலையில் பழங்களை சாப்பிட விரும்பினால் அதனுடன் நட்ஸ்கள், முழு தானியங்கள், முட்டை போன்ற ஆரோக்கியமான உணவுகளை சேர்த்து உட்கொள்ளலாம்.

பழங்களில் ஆன்டி ஆக்சிடென்டுகள், வைட்டமின்கள் சி, ஏ, ஈ. போலேட், பொட்டாசியம் போன்ற ஊட்டச்சத்துகள் மற்றும் நார்ச்சத்துகள் நிரம்பி இருந்தாலும் அவற்றை மட்டுமே நம்பி இருப்பது வளர்ச்சிதை மாற்றம், ரத்தத்தில் சர்க்கரை அளவு போன்றவற்றில் பாதிப்பை ஏற்படுத்திவிடும்.

ஒட்டுமொத்த உடல் நலனுக்கு இந்த சத்துக்கள் மட்டுமே போதுமானது அல்ல. குறிப்பாக புரதம், வைட்டமின் பி12, கால்சியம், இரும்புச் சத்து, ஒமேகா 3 போன்ற ஆரோக்கியமான கொழுப்புகள் உடலுக்கு கிடைக்காமல் போய்விடும்.

நரம்புகள் மற்றும் ரத்த சிவப்பணுக்களுக்கு வைட்டமின் பி 12 அவசியமானது. மூளை மற்றும் இதய ஆரோக்கியத்துக்கு ஒமேகா 3 கொழுப்பு அமிலம் மற்றும் ஆரோக்கியமான கொழுப்புகள் தேவையானது. பழங்களில் இருந்து இவற்றை பெறமுடியாத நிலையில் உடல் பலவீனமடையும்.

உடலில் புரதம், கொழுப்பு அளவு குறையும்போது வளர்சிதை மாற்றம் மெதுவாகும். அதன் காரணமாக உடல் ஆற்றல் குறைந்துவிடும். ரத்தத்தில் சர்க்கரை அளவிலும் ஏற்றத்தாழ்வுகளை ஏற்படுத்தும். ஊட்டச்சத்து குறைபாடுகளுக்கு வழிவகுத்து பல்வேறு நோய் பாதிப்புகளை ஏற்படுத்திவிடும்.

பழங்களில் இருக்கும் நார்ச்சத்து செரிமானத்திற்கு உதவக்கூடியது. ஆனால் பழங்களை மட்டுமே உண்பது குடல் நுண்ணுயிரிகளின் சமநிலையை சீர்குலைக்கும். தீங்கு விளைவிக்கும் பாக்டீரியாக்களை அதிகரிக்க செய்துவிடும்.

வயிறு வீக்கம், மூளை ஆரோக்கியமும் பாதிப்படையும். பழங்களுடன் காய்கறிகள், பருப்பு வகைகள், முழுதானியங்கள் உள்ளிட்ட அனைத்து வகை ஊட்டச்சத்துமிக்க உணவுகளை உட் கொள்வதே குடல் மற்றும் ஒட்டுமொத்த ஆரோக்கியத்துக்கு நன்மை அளிக்கும்.